पणजी: नव्‍या झुआरी पुलावरील मनोरा तसेच फिरत्‍या रेस्‍टॉरंटचे काम ३१ मार्च २०३१ पूर्ण होईल, अशी माहिती केंद्रीय रस्‍ते आणि महामार्ग मंत्री नितीन गडकरी यांनी लोकसभेतील लेखी प्रश्‍‍नाच्‍या उत्तरातून दिली आहे. दक्षिण गोव्‍याचे खासदार कॅ. विरियातो फर्नांडिस यांनी याबाबतचा प्रश्‍‍न विचारला होता.

नव्‍या झुआरी पुलावर बांधण्‍यात येत असलेल्‍या मनोरा आणि फिरत्‍या रेस्टॉरंटची आवश्यकता असण्याची कारणे कोणती, मनोरा आणि रेस्टॉरंटच्या बांधकामासाठीचा अंदाजित खर्च किती आहे, मनोरा आणि रेस्‍टॉरंट पाहण्‍यासाठी येणाऱ्यांच्‍या वाहनांसाठी पार्किंगची जागा कोठे असेल आणि बांधकाम कधीपर्यंत पूर्ण होईल, असे प्रश्‍‍न फर्नांडिस यांनी विचारले होते.

त्‍यावर झुआरी पुलावरील मनोरा तसेच फिरत्‍या रेस्टॉरंटचे बांधकाम ३१ मार्च २०३१ पर्यंत पूर्ण होईल, असे मंत्री गडकरी यांनी म्‍हटले आहे. पुलावरील मनोरा तसेच फिरत्‍या रेस्‍टॉरंटचे काम गोवा सरकारच्‍या विनंतीवरून करण्‍यात येत आहे. हा प्रकल्‍प सार्वजनिक - खासगी भागीदारी तत्त्‍वावर (पीपीपी) उभारण्‍यात येत असल्‍याचेही त्‍यांनी नमूद केले आहे.