Goa Congress : गोवा काँग्रेसमधील बंडानंतर आता काँग्रेस नेतृत्वाने स्थानिक पक्षसंघटनात बदल करण्यास सुरुवात केली आहे. गोवा विधानसभेतील काँग्रेस विधीमंडळ नेतेपदी आमदार युरी आलेमाव यांची नियुक्ती करण्यात आली आहे. काँग्रेसचे राष्ट्रीय सचिव के सी वेणूगोपाल यांनी ही घोषणा केली आहे. मात्र युरी आलेमाव या निर्णयावर खुश नसल्याची सुत्रांची माहिती आहे.

काँग्रेस पक्षाचा विधिमंडळ नेता सप्टेंबर महिन्याच्या तिसऱ्या आठवड्यात ठरणार असल्याचं गोवा काँग्रेस प्रदेशाध्यक्ष अमित पाटकर यांनी याआधीच स्पष्ट केलं होतं. त्यासाठी गोव्यात 11 किंवा 12 रोजी पक्षाचे सरचिटणीस मुकुल वासनिक गोव्यात येणार असल्याचंही बोललं जात होतं. सर्व आमदारांची मते जाणून घेतल्यानंतर ते त्या नेत्याचे नाव जाहीर करतील, असं पाटकरांनी जाहीर केलं होतं. मात्र काँग्रेसमधील अंतर्गत बंडाळीनंतर सर्व समीकरणं बदलली आणि वासनिक यांचा गोवा दौरा काही होऊ शकलेला नाही. मात्र यातच उरलेल्या तीन आमदारांपैकी युरी आलेमाव यांच्या गळ्यात पक्ष नेतृत्त्वाने गटनेतेपदाची माळ घातली आहे.

आठ आमदार भाजपमध्ये गेल्‍यानंतर काँग्रेसचे तीनच आमदार शिल्लक राहिलेत. यामुळे विधिमंडळ गटनेतेपदासाठी हळदोणेचे आमदार ॲड.कार्लुस फेरेरा आणि कुंकळ्ळीचे आमदार युरी आलेमाव यांच्यापैकी एकाची निवड होणार असल्याचं बोललं जात होतं. परंतु काँग्रेसला विरोधी पक्षनेते पद मिळणार का?, असा प्रश्‍न सध्या निर्माण झाला आहे.

यासंदर्भात ॲड.कार्लुस फेरेरा यांनी सांगितले, राज्य विधानसभेच्या नियमानुसार सभागृहात सत्ताधारीच्या पक्षानंतर सर्वाधिक संख्याबळ असलेल्या पक्षाला प्रमुख विरोधी पक्ष मानला जातो. त्याच पक्षातील विधिमंडळ गटनेत्याला सभापतींनी मंजुरी दिल्यानंतर विरोधी पक्षनेते पद दिले जाते. दरम्यान, आमदार फुटले असले तरी अजूनही काँग्रेसचा विधिमंडळ गटनेता निश्‍चित झालेला नव्हता. मायकल लोबो यांची हकालपट्टी करून दोन महिने उलटले तरी पक्षाचे विधिमंडळ गटनेतेपद रिक्तच होते.