Margao Drugs Case: फातोर्डा पोलीसांनी मडगाव येथील होलसेल मासळी मार्केट परीसरात कारवाई करून एलएसडी पेपर हा अंमली पदार्थ बाळगल्या प्रकरणी ठाण्यातील युवकाला रंगेहाथ पकडून अटक केली आहे.

ओंकार चंदरकर (23) असे संशयित आरोपीचे नाव असून तो ठाणे महाराष्ट्रातील रहिवाशी आहे. सध्या फातोर्डा येथील माडेल या ठिकाणी भाड्याच्या खोलीत राहत होता. या विषयीची माहिती प्राप्त होताच आज सकाळी त्याच्यावर पाळत ठेऊन रंगेहाथ त्याला पकडण्यात आले.

त्याची पोलिसांनी झडती घेतील असता 40 हजार रुपये किमतीचे एलएसडी पेपर्स सापडले. या युवकाला अटक केल्यानंतर त्या विषयीची माहिती संशयिताच्या नातेवाईकांना दिली असल्याचे पोलिसांनी सांगितले. सध्या या प्रकरणी उपनिरिक्षक योगेश गावकर तपास करत आहेत.

काही दिवसांपूर्वी गोवा पोलिसांनी अंमली पदार्थ बाळगल्याप्रकरणी नाशिकच्या एका संशयिताला अटक केली होती. पंकज सुरेश असे त्याचे नाव असून कारवाईवेळी संशयिताकडून 1.80 लाख रुपयांचे अंमली पदार्थ जप्त केले होते. जप्त केलेल्या अमली पदार्थांमध्ये एमडीएमए (8 ग्रॅम) आणि 10 ग्रॅम चरस यांचा समावेश असल्याची माहिती समोर आली होती.