Photographer arrested for selling cannabis in Goa

मडगाव: गोव्यात फोटोग्राफर म्हणून आलेला एकजण चक्क गांजा विक्रेता निघाला. मडगाव पोलिसांनी शनिवारी मध्यरात्री केलेल्या एका कारवाईत मूळ तामिळनाडू राज्यातील एकाला गांजासह पकडले असता ही धक्कादायक बाब पोलिस तपासात उघड झाली.

अटक केलेल्या संशयिताचे नाव अरुण प्रसाथ गणेशन (३०) असे असून तो मूळ तामिळनाडू राज्यातील आहे. मालभाट येथे ओल्ड रेल्वे स्टेशन रोडजवळ मध्यरात्री पोलिसांनी त्याच्या मुसक्या आवळल्या. त्याची झडती घेतली असता त्याच्याकडे १०९६ ग्रॅम गांजा सापडला. त्याची किंमत १ लाख ९ हजार ६०० रुपये इतकी आहे. घटनेचा पंचनामा करून पोलिसांनी नंतर त्याला रितसर अटक केली.

तामिळनाडूतून त्याने हा गांजा आणला होता, असे प्राथमिक पोलिस तपासात आढळून आले आहे. गोव्यातील किनारपट्टीवर तो फोटोग्राफर म्हणून उपजीविका करीत असल्याचे भासवीत असला तरी पर्यटकाना हेरून त्यांना गांजा विकण्याचा त्याचा प्रमुख धंदा बनला होता.

दक्षिण गोवा पोलिस अधीक्षक सुनीता सावंत यांच्या मार्गदर्शनाखाली पोलिस निरीक्षक तुळशीदास नाईक व हवालदार गोरखनाथ गावस यांनी या संशयिताला अटक केली. अमलीपदार्थ प्रतिबंधात्मक कायद्याखाली त्याच्यावर गुन्हा नोंद केला आहे.