Goa Drugs Case: गोव्यात नोकरी शोधायला येताना सोबत आणला गांजा; उत्तर प्रदेशच्या तरुणाला अटक, न्यायालयीन कोठडीत रवानगी

मडगाव: गांजा प्रकरणी मडगाव पोलिसांनी अटक केलेल्या ओमप्रकाश पार्सिया हा रोजगाराच्या शोधात गोव्यात आला होता व येताना त्याने उत्तर प्रदेशातून सोबत गांजाही आणला होता, असे पोलिस तपासात उघड झाले आहे. पोलिस कोठडीची त्याची मुदत शुक्रवारी संपल्याने त्याला पुन्हा न्यायालयात उभे केले असता न्यायालयीन कोठडीत त्याची रवानगी करण्यात आली.

१० रोजी ओमप्रकाशला येथील ओल्ड स्टेशन रोड येथे पोलिसांनी पकडून त्याची झडती घेतली असता त्याच्याकडे ३०४ ग्राम गांजा सापडला होता. त्याची किंमत ३० हजार ४०० रुपये इतकी होती. नंतर त्याला अधिक तपासासाठी तीन दिवसांची पोलिस कोठडी देण्यात आली होती. गांजा कुठून आणला होता याची माहिती त्याच्याकडून पोलिसांनी वदवून घेतली.

त्यावेळी त्याने उत्तर प्रदेश राज्यातून हा गांजा आणल्याची कबुली दिली. तो रोजगाराच्या शोधात गोव्यात आला होता. येथे त्याचे दोन मित्र आहेत. त्यांच्या मदतीने येथे काम मिळेल म्हणून तो आला होता. गांजा विकल्यास पैसेही मिळेल म्हणून त्याने येताना सोबत गांजाही आणला होता. मात्र तो पोलिसांच्या तावडीत सापडला व गजाआड झाला.