Goa News: कुंडई औद्योगिक वसाहतीतील एका कंपनीच्या कामगाराला चोरीच्या संशयावरून दोन पोलिसांनी बेदम मारहाण केली. याप्रकरणी गोमंतक मजदूर संघाचे अध्यक्ष तथा कामगारनेते पुती गावकर यांनी या पोलिसांना त्वरित निलंबित करून त्यांची सखोल चौकशी करण्याची मागणी फोंड्यातील पत्रकार परिषदेत केली. यावेळी पीडित कामगार नारायण राऊतराय उपस्थित होता.

पोलिसांत दिलेल्या तक्रारीनुसार, सोमवार, 23 रोजी कुंडई औद्योगिक वसाहतीतील या कारखान्यात ड्युटीवर नारायण राऊतराय हा गेला असता, कुंडई आऊटपोस्टवरील पोलिस कारखान्यात आले व नारायणला चोरीच्या आरोपावरून चौकशीसाठी नेले.

या कारखान्यात झालेल्या चोरीप्रकरणी एका रोजंदारीवरील कामगाराचा मोबाईल कारखान्याच्या अधिकाऱ्याकडे होता. मात्र, नारायणने या संशयित कामगाराच्या मोबाईलवर फोन केला असता, संबंधित अधिकाऱ्याने लगेच पोलिसांना बोलावले.

त्यानुसार आदित्य मांद्रेकर व विनय शिरवईकर या दोन्ही पोलिसांनी नारायणला ताब्यात घेऊन चौकशीच्या नावाखाली त्याला मारहाण केली.

पाच हजार रुपयांची मागणी

मारहाणीनंतर नारायणला सोडण्यासाठी पोलिसांनी पाच हजार रुपयांची मागणी केली. मात्र, आपल्याकडे तेवढे पैसे नसल्याचे नारायणने सांगितल्यावर शेवटी दीड हजारांवर हे पोलिस तयार झाले. त्यानुसार दीड हजार रुपये विनय शिरवईकरच्या मोबाईलवर ट्रान्स्फर करण्यात आले. नारायणला सोडल्यानंतर तो कारखान्यात आला व खाली कोसळला.

न्याय देण्यासाठी तत्पर

कामगारांना न्याय देण्यासाठी आपली कामगार संघटना गोमंतक मजदूर संघ कार्यरत आहे. नारायण राऊतराय हा आपल्या संघटनेशी निगडित असून कंपनी व्यवस्थापनाकडून आपल्या कामगार संघटनेच्या कामगारांची सतावणूक केली जात असल्याचा आरोपही पुती गावकर यांनी केला आहे.