मडगाव: रावणफोंड येथील पूर्व बगल मार्गावर येणाऱ्या सहा पदरी उड्डाण पुलासाठी निविदा तयार करण्यात आली आहे. आता हा खर्चाचा तपशील गोवा साधनसुविधा महामंडळाच्या समितीसमोर मांडून लवरकच कामाची निविदा जारी करण्यात येणार आहे,अशी माहिती मडगावचे आमदार दिगंबर कामत यांनी दिली.

आज त्यांनी साधनसुविधा महामंडळाच्या अभियंत्यांसमवेत बैठक घेऊन या कामाचा आढावा घेतला. वास्तविक हे काम यापूर्वीच सुरू होणार होते, मात्र विधानसभा निवडणूक आचारसंहिता लागू झाल्यामुळे या कामाची प्रकिया बंद पडली होती, असे त्यांनी सांगितले.

सध्या रावणफोंड येथे जो उड्डाणपूल आहे. त्यालाच समांतर, असा हा सहा पदरी उड्डाणपूल बांधण्यात येणार असून हा पूल बांधल्यावर कारवारच्या दिशेने जाणारी वाहतूक विना व्यत्यय करता येणार आहे. या मार्गावरील नियमित वाहतूकदारांची अनेक वर्षांपासूनची तशी मागणी आहे.

रिंग रोड परिसराचे सौंदर्यीकरण आणि लोकांना सकाळी व्यायाम करण्यासाठी ‘वॉकिंग ट्रॅक’ या कामाचाही आज कामत यांनी आढावा घेतला.