पणजी: गोव्यातील जवळपास एक लाख महिलांनी ग्रामीण विकास संस्थेकडून १ लाख ते ४ लाख रुपयांपर्यंतच्या व्याजमुक्त कर्जासाठी अर्ज केला होता आणि या रकमेतून त्यांनी स्वतःचे व्यवसाय उभे केल्याची माहिती राज्याचे मुख्यमंत्री डॉ. प्रमोद सावंत यांनी दिली. मार्केटिंग आणि आर्थिक पाठबळाच्या जोरावर गोव्यातील महिलांना व्यवसाय उभे करण्यासाठी मदत केली जाईल असे देखील मुख्यमंत्री ग्रँड अस्तुरी 2024 या कार्यक्रमात म्हणालेत.

कुठलीही नवीन गोष्ट हाती घेण्यात महिला पुरुषांपेक्षा अधिक सक्षम आहेत. बँक किंवा स्वयंचलित गटांकडून घेतलेली रक्कम परत करण्यात देखील महिला नेहमीच यशस्वी झाल्या आहेत आणि महिलांवर अगदी सहज विश्वास देखील ठेवला जातो, जी त्यांची जमेची बाजू आहे असे म्हणत मुख्यमंत्र्यांनी उद्योग क्षेत्रात उतरलेल्या महिलांचं कौतुक केलं.

महिलांजवळ उत्तम व्यवसाय चालवण्याचे गुण आहेत मात्र आर्थिक मदत मिळत नसल्याने किंवा मार्केटिंगमुळे त्या अनेकवेळा मागे राहतात. महिलांना जर का या सुविधा मिळाल्या तर नक्कीच त्या उत्तम व्यवसाय चालवून दाखवू शकतील असा विश्वास मुख्यमंत्री डॉ. प्रमोद सावंत यांनी व्यक्त केला.

गोवा चेंबर्स ऑफ कॉमर्स आणि इंडस्ट्रीजचे अध्यक्ष श्रीनिवास धेम्पो देखील या कार्यक्रमात उपस्थित होते. जमलेल्या सर्वांसमोर मत व्यक्त करताना त्यांनी देखील महिलांच्या कामाचा गौरव केला. धेम्पो म्हणाले की जागतिक स्थरावर महिला उत्तम कामगिरी बजावत आहेत आणि गोवा देखील याला अपवाद ठरत नाही, मात्र महिलांनी आणखीन मोठी झेप घ्यावी म्हणून त्यांच्यासाठी काही प्रशिक्षण शिबिरांची आखणी तसेच आर्थिक मदत केली गेली पाहिजे. समाजातील संकुचित वृत्तीमुळे आपण महिलांचे नेतृत्व स्वीकारण्यात मागे पडतो असेही ते म्हणाले होते.