Goa Accident Death

कान्सा-थिवी येथे ट्रकने ओला इलेक्ट्रीक या स्कूटरला धडक दिल्याने झालेल्या अपघातात सुजाता साळगावकर (वय २६, रा. नास्नोळा-बार्देश) ही युवती ठार झाली. तर अपघातानंतर संशयित ट्रकचालकाने घटनास्थळावरून पळ काढला.

उपलब्ध माहितीनुसार, हा अपघात शनिवारी दुपारी दीडच्या सुमारास घडला. जीए-०८-टी-५४९४ क्रमांकाचा ट्रक माडेल ते अस्नोडाच्या दिशेने जात होता, तर विरुद्ध दिशेने सुजाता साळगावकर ही जीए-०३ -एएक्स- २२५४ क्रमांकाच्या ओला इलेक्ट्रीक स्कूटरवरून येत होती.

कान्सा-थिवी येथे भारतीय स्टेट बँकेजवळ संशयित ट्रकचालकाने चुकीच्या दिशेने जात समोरून येणाऱ्या दुचाकीला धडक दिली. ट्रकची धडक बसताच युवती दुचाकीवरून उसळून रस्त्यावर पडली आणि गंभीर जखमी झाली. तिची दुचाकी ट्रकच्या खाली सापडली.

जखमीला म्हापसा जिल्हा इस्पितळात उपचारार्थ दाखल केले. पण त्यापूर्वीच तिचा मृत्यू झाला होता. अपघातानंतर ट्रकचालकाने वाहन घटनास्थळीच सोडून पळ काढला.

पणजीत कारचा अपघात

पणजी शहरात शुक्रवारी रात्री उशीरा गोवा मनोरंजन सोसायटी (Entertainment Society of Goa) समोर कारचालकाचा ताबा सुटून कार विजेच्या खांबाला धडकली. या अपघातात कारचालक किरकोळ जखमी. सुदैवाने जिवितहानी झाली नाही.