पद्माकर केळकर

Women Day Special :

जीवनात २०१० साली फार वाईट घटना घडली. पतीचे अचानक निधन झाल्याने संसाराच्या सुखात दु:ख पसरले. पण कठीण समयी बंधूंनी साथ दिली व पुन्हा जीवनात नवी पहाट आली. भावाने घरी आश्रय दिला.

हळूहळू स्वत:ला सावरत कपडे शिवणे, लेखन, गायन, वादन आणि कीर्तनकार बनले. स्वत:ला सिद्ध करून दाखवले, असे धावे-सत्तरी येथील प्रज्वलिता प्रकाश गाडगीळ यांनी सांगितले.

पतीच्‍या निधनानंतर सगळा संसार वाऱ्यावर पडला होता. अशा बिकट स्थितीत साखळीत राहून शिवणवर्गाला जाऊ लागली. त्यानंतर रवींद्र भवनात गायन, सतारवादन, हार्मोनियमवाद अशा उपक्रमांत सहभाग घेतला.

सतारवादनाच्या कार्यशाळा असायच्या. तिथेच कीर्तन शिबिर असायचे. त्‍यामुळे कीर्तनाची आवड निर्माण झाली. उदयबुवा फडके यांच्याकडे कीर्तनाचे धडे घेतले आणि नंतर सुरू झाला माझा कीर्तनप्रवास, असे प्रज्‍वलिता यांनी सांगितले. वर्तमानपत्रांत लेखन केले, रेडिओ केंद्रावरही काम केले, असेही त्‍यांनी स्‍पष्‍ट केले.

प्रज्‍वलिता सांगतात, बायांनो, कधीच आयुष्यात कायमस्वरूपी सुख मिळत नाही. दुःख माणसाच्‍या जीवनात असतंच. म्हणून त्यात होरपळून जाऊ नये. हळूहळू त्‍यातून बाहेर येऊन आपण आपल्या जीवनाचे सार्थक करून घेतले पाहिजे.

कठीण प्रसंगातून सावरत मी दोन्ही मुलांना उत्तम शिक्षणही दिले. भाऊ सागर जावडेकर याच्यामुळे विविध क्षेत्रांत उल्लेखनीय योगदान देऊन स्वत:ची वेगळी प्रतिमा समाजात तयार केली.

विपुल लेखन. प्रवचन, संगीत, सामाजिक, शैक्षणिक, सांस्‍कृतिक, आध्यात्मिक उपक्रमांत सहभाग घेतला. हस्तकला, सूत्रनिवेदन, भरतकाम, विणकाम केले.