मडगाव: महिलांच्या आशा- आकांक्षा जाणून घेऊन त्यांना मूर्त रूप देण्यासाठी एक आराखडा तयार करून त्यानुसार पुढे काम करण्याच्या उद्देशाने 'गोमन्तक'ने सुरू केलेल्या जनमन उत्सव (Janman Utsav) उपक्रमाअंतर्गत मुरगाव (Murgaon) मतदारसंघात चालू असलेले सर्वेक्षण सध्या अंतिम टप्प्यात आहे. आज सासमोळे बायणा येथील महिलांनी या सर्वेक्षणात सहभाग घेऊन आपली मते नोंदविली.

काल बुधवारी काटे-बायणा येथील बूथ क्रमांक 22 वर झालेल्या सर्वेक्षणात स्थानिक महिला मंडळाच्या जयश्री कुमठेकर सहभागी झाल्या होत्या. महिलांना त्यांचे स्वतःचे असे व्यासपीठ मिळवून देण्यासाठी 'गोमन्तक'ने हाती घेतलेल्या या उपक्रमाचे त्यांनी मनापासून कौतुक केले.

यापूर्वी कुठ्ठाळी आणि दाबोळी • या दोन मतदारसंघांत हे सर्वेक्षण पूर्ण झाले आहे. केपे मतदारसंघात सर्वेक्षण पूर्ण संपल्यानंतर आजपासून कुडचडे मतदारसंघात ते सुरू झाले. तेथील शेळवण या भागात आज झालेल्या सर्वेक्षणाला या भागातील महिलांनी चांगला प्रतिसाद दिला. यापूर्वी काणकोण मतदारसंघातही सर्वेक्षण करण्यात आले होते.

या सर्वेक्षणातून राज्यातील सुमारे तीन लाख महिलांची मते नोंदवून घेऊन एक व्यापक आराखडा तयार करण्याच्या उद्देशाने सर्व मतदारसंघांत सर्वेक्षण होणार आहे. सध्या कुडतरी मतदारसंघातही सर्वेक्षण सुरू आहे. काल आणि आज असे दोन दिवस घोगळ हाऊसिंग बोर्ड येथील महिलांनी त्यात सहभाग घेऊन आपली मते नोंदविली.