Goa Crime News: कचरा गोळा करणाऱ्या पालिकेच्या एका स्वच्छता कामगाराकडून डिचोलीत एका महिलेचा विनयभंग करून तिच्यावर अतिप्रसंग करण्याचा अयशस्वी प्रयत्न केल्याची धक्कादायक माहिती काही दिवसांपूर्वी समोर आली. या प्रकारामुळे पालिकेत खळबळ माजली आहे.

नंतर अद्याप पालिकेने या प्रकरणात कोणतीच करवाई न केल्याने डिचोली गट काँग्रेससह महिला विभागाने पालिकेवर धडक देत जाब विचारला.

संपूर्ण प्रकरण असे की...

एका घरात ‘केअर टेकर’ म्हणून काम करणारी मूळ बंगालमधील एक विवाहित महिला घरात एकटी असल्याची संधी साधून तिचा विनयभंग करून तिच्यावर अतिप्रसंग करण्याचा प्रयत्न संबंधित कामगाराने केल्याचा संशय आहे.

पीडित महिलेने आरडाओरड करताच आणि सीसीटिव्ही कॅमेरा असल्याचे लक्षात येताच, संशयित कामगाराने घराजवळील संरक्षक भिंतीवरून उडी मारून तेथून काढता पाय घेतला.

संरक्षक भिंतीवरून उडी मारून संशयित कामगार तेथून जात असल्याचे दृश्‍यही सीसीटिव्ही कॅमेऱ्यात कैद झाले आहे. पीडित महिलेने पालिकेत येऊन अधिकाऱ्यांकडे तक्रार करताच, अधिकाऱ्यांनी या प्रकरणाची चौकशी सुरू केली. मात्र अद्याप ठोस पावले उचलली नसल्याने कॉंग्रेसने याबाबत जाब विचारत कारवाईची मागणी केली. तसेच या संदर्भात निवेदन सादर केले आहे.

हा प्रकार डिचोली पालिका क्षेत्रातील प्रभाग-14 मधील एका वसाहतीत घडला आहे. मूळ बंगाल येथील पीडित महिलेने पालिकेत तक्रार दाखल करताच, ज्या कामगारावर संशय आहे, त्याला सध्या तरी कामावर न येण्याची ताकीद पालिकेने दिली.

संबंधित महिलेने मात्र, अद्याप पोलिसांत तक्रार केलेली नाही. सध्या मात्र या प्रकाराची पालिकेत जोरदार चर्चा चालू आहे. या प्रकारामुळे या प्रभागामधील महिलावर्गही भयभीत झाला आहे. त्यांनी या गोष्टीचा धसका घेतला आहे.