Accident Near Bicholim Bus Stand

डिचोली: डिचोलीत विविध भागात सध्या लहानसहान अपघातांचे सत्र चालूच आहे. शहरातील बसस्थानकाजवळ दोन दुचाकीमध्ये झालेल्या अपघातात एक महिला जखमी झाली. हा अपघात रात्री उशिरा घडला.

अपघातानंतर अपघातस्थळी मोठी गर्दी जमली. अपघातावरून बराचवेळ वादविवाद झाल्यानंतर प्रकरण आपापसात मिटवण्यात आले. यासंबंधीची माहिती अशी की, एक दाम्पत्य स्कुटरवरून बंदरवाडामार्गे बसस्थानका जवळील मुख्य रस्त्यावर येत असता, तेथील वळणावर समोरून येणाऱ्या अन्य एका दुचाकीची बंदरवाडामार्गे येणाऱ्या दुचाकीला जोरदार धडक बसली. त्याबरोबर या स्कुटरच्या मागे बसलेली महिला रस्त्यावर पडली.

तिच्या पायाला मार लागला. अपघातानंतर लगेच घटनास्थळी मोठी गर्दी जमली. अपघातास कारणीभूत कोण? यावरून बराचवेळ वादविवाद झाल्यानंतर प्रकरण हातघाईपर्यंत आले होते. मात्र नंतर काहीनी मध्यस्थी केल्यानंतर प्रकरण मिटले. तोपर्यंत बंदरवाडा रस्त्यावरील वाहतूक काहीवेळ खोळंबून राहिली. जखमी महिला ही मुस्लिमवाडा परिसरातील असल्याची माहिती मिळाली आहे.