Sanquelim Bicholim Road Accident

डिचोली: डिचोली-साखळी रस्त्यावर ‘स्पीडब्रेकर’मुळे धावत्या मोटरसायकलवरून मागे बसलेली महिला पडून जखमी झाली. या अपघातात सुरेखा कुंभार ही महिला सुदैवाने बचावली खरी, मात्र हातापायासह तोंडाला मार लागला. हा अपघात आज (शुक्रवारी) सकाळी डिचोली-साखळी रस्त्यावरील कुळण येथे घडला.

गतिरोधकाचा अंदाज आला नसल्याने मोटारसायकल चालकाचे नियंत्रण गेले आणि हा अपघात घडला असून याला सर्वस्वी सार्वजनिक बांधकाम खात्याचा निष्काळजीपणा जबाबदार असल्याचे स्पष्ट झाले आहे. अपघातात जखमी खांडेपार येथील सुरेखा कुंभार या डिचोली मामलेदार कार्यालयातील कर्मचारी आहेत, अशी माहिती मिळाली आहे.

सुरेखा कुंभार या साखळी येथून लिप्ट घेऊन एका मोटारसायकलवर बसून डिचोलीत येत होत्या. कुळण येथील गतिरोधकाचा अंदाज आला नसल्याने वेगात असलेल्या मोटरसायकलला गतिरोधकावर गचका बसला. त्याबरोबर मागे बसलेल्या सुरेखा या तोल जाऊन रस्त्यावर पडल्या. गोमन्तकचे प्रतिनिधी तुकाराम सावंत यांनी जखमी महिलेला आपल्या मोटारगाडीतून डिचोलीच्या सामाजिक आरोग्य केंद्रात नेले.

निष्काळजीपणा जबाबदार

अपघात घडला त्यावेळी अपघातास कारणीभूत ठरलेल्या गतिरोधकावर सफेद पट्टे नव्हते. त्यामुळे मोटारसायकल चालकाला या गतिरोधकाचा अंदाज आला नाही. अचानक ब्रेक लावताच मागे बसलेल्या सुरेखा तोल जाऊन खाली पडल्या. मिळालेल्या माहितीनुसार गुरुवारी रात्री कुळण परिसरात रस्त्यावरील काही भागात हॉटमिक्स डांबरीकरण आले आहे. त्यावेळी दोन ठिकाणी नव्याने गतिरोधक घालण्यात आले आहेत.