छत्तीसगढ: बँकॉक-गोव्याला पाठवण्याच्या नावाखाली एका टूर अँड ट्रॅव्हलिंग कंपनीने २० ते २५ वृद्धांची फसवणूक केली आहे. कंपनीचे कर्मचारी वृद्धांकडून ३५ लाख रुपये वसूल करुन फरार झाले. याप्रकरणातील संशयित महिलेला तब्बल १० वर्षांनंतर अटक करण्यात आली आहे. छत्तीसगढ राज्यातील रायपूर येथे ही घटना घडली.

याप्रकरणी अभिनव सोनी यांनी २०१५ मध्ये सिव्हिल लाईन्स पोलिस स्टेशनमध्ये तक्रार दाखल केली होती. कमर एजाज अहमद आणि श्रद्धा राजपूत यांनी पंड्री बस स्टँडसमोरील श्याम प्लाझामध्ये इमाम टूर्स अँड ट्रॅव्हल्सच्या नावाने कार्यालय सुरु केले होते.

सिंगापूर, बँकॉक, हाँगकाँग, गोवा टूरच्या नावाखाली २० ते २५ वृद्ध लोकांकडून सुमारे ३५ लाख रुपये घेतले. दरम्यान, यातील नागरिकांना टूरला घेऊन न जाता फसवणूक केल्याचा आरोप त्यांच्यावर आहे.

फसवणूक झाल्याचे उघडकीस आल्यानंतर याप्रकरणी पोलिसांनी एफआयआर दाखल केली. दरम्यान, दोन्ही आरोपींनी फरार झाले. पोलिसांचा शोध सुरुच होता. सिव्हिल लाईन पोलिसांना याप्रकरणातील एकजण संशयित श्रद्धा राजपूत ढियारी परिसरात लपून बसल्याची माहिती मिळाली. यानंतर पोलिसांनी या परिसरात छापा टाकून संशयित महिलेला अटक केली.

संशयित महिला टूर कंपनीत अकाउंटंट म्हणून काम करायची. या प्रकरणातील मुख्य आरोपी अद्याप फरार आहे. पोलिसांनी त्याच्याविरुद्ध लूक-आउट सर्क्युलर जारी केले आहे.