मोरजी: ओंकार हत्ती वारंवार कडशी-मोपा परिसरात येऊन शेतकऱ्यांच्या पिकांची नासाडी करत असल्याने आता या हत्तीचा कायमचा बंदोबस्त करावा, अशी मागणी उगवेवासीयांनी श्री देवी माऊली मंदिरात शनिवारी घेतलेल्या बैठकीत केली.

मोपा सरपंच सुबोध महाले यांनी सांगितले,की उगवेवासीयांची महत्त्वाची बैठक झाली.या बैठकीत सरकारने या ओंकार हत्तीचा लवकरात लवकर बंदोबस्त करावा, यासाठी वन महामंडळाच्या अध्यक्ष दिव्या राणे यांची भेट घेऊन त्यांच्याकडे तशी मागणी करणार असल्याचे सांगितले.

वन अधिकारी आणि पथकाने ओंकार हत्तीला सातहून अधिक वेळा महाराष्ट्र हद्दीत पाठवण्याचा प्रयत्न केला. परंतु तेथील वन अधिकारी, कर्मचारी, नागरिकांचे योग्य सहकार्य मिळत नसल्याने ते ‘ओंकार’ला हाकलून देत असतात. आता वन महामंडळाच्या अध्यक्ष दिव्या राणे यांनी यात लक्ष घालून या ‘ओंकार’चा कायमस्वरूपी बंदोबस्त करावा, अशी मागणी उगवेवासीयांनी बैठकीत शेतकऱ्यांच्या उपस्थितीत केली.

तिळारी (महाराष्ट्र) ते पेडणे (गोवा) या सीमेवर ‘ओंकार’ हत्ती अधूनमधून गावांमध्ये व शेतांमध्ये घुसून मोठ्या प्रमाणात धुडगूस घालत आहे. काजू, माड, पोफळी व इतर शेती पिकांचे प्रचंड नुकसान होत आहे. त्यामुळे गावकऱ्यांत भीती पसरली आहे.

हत्तीला पकडून सुरक्षित जंगलात स्थलांतर करावे. प्रशिक्षित पथक नेमावे. सीमाभागात कायमस्वरूपी संरक्षण यंत्रणा नेमावी. जर वेळेत उपाययोजना झाली नाही, तर हा हत्ती थेट मानवी जीवितावर बेतू शकतो, अशी भीती उदय महाले यांनी व्यक्त केली.