पेडणे: महाराष्ट्र-सिंधुदुर्ग सीमेवरून आलेल्या 'ओंकार' नावाच्या हत्तीने पेडणे तालुक्यातील कडशी, मोपा, तोरसे, आणि तांबोसे या भागात धुमाकूळ घातला आहे. गेले काही दिवस हा हत्ती बागायती आणि शेतीचे मोठ्या प्रमाणावर नुकसान करत आहे. वन विभागाचे अधिकारी त्याला हुकलावून लावण्याचा प्रयत्न करत असले तरी त्यांना यश मिळत नाहीये, त्यामुळे शेतकरी हवालदिल झाले आहेत.

तीन-तीन तास ठिय्या

एकीकडे वनमंत्री विश्वजीत राणे हे कर्नाटक आणि महाराष्ट्राच्या वनमंत्र्यांशी आणि अधिकाऱ्यांशी चर्चा करून हत्तीला परत पाठवण्यासाठी उपाययोजना करत आहेत. पण दुसरीकडे, हा हत्ती सलग तिसऱ्या दिवशीही तांबोसे गावात शेतीची नासधूस करतोय. ज्या ठिकाणी तो शेतीचे नुकसान करतो, त्याच ठिकाणी तो तीन-तीन तास ठिय्या मांडून बसल्याचे चित्र दिसून येत आहे.

या हत्तीला तातडीने कर्नाटक किंवा महाराष्ट्रात परत पाठवावे

गेल्या तीन दिवसांपासून हा हत्ती याच परिसरात ठाण मांडून बसलेला असतानाही वन विभागाकडून कोणतीही ठोस कारवाई करण्यात आलेली नाही, यामुळे शेतकऱ्यांमध्ये तीव्र नाराजी आहे. या हत्तीला तातडीने कर्नाटक किंवा महाराष्ट्रात परत पाठवावे, अशी मागणी शेतकरी करत आहेत.

वन विभागाने नुकसानीची भरपाई देण्याचे आश्वासन दिले असले तरी, भरपाई मिळायला बराच वेळ लागेल आणि तोपर्यंत हा हत्ती शेतीचे आणखी नुकसान करत राहील, अशी भीती शेतकऱ्यांनी व्यक्त केली आहे.