डिचोली: डिचोली शहरातील लाखेरे भागात गव्यांचा संचार वाढल्यानं स्थानिक नागरिकांमध्ये भीतीचं वातावरण निर्माण झालं आहे. गेल्या काही दिवसांपासून या भागात वारंवार गव्यांचा वावर दिसून येत आहे. यामुळे शेती आणि बागायती पिकांचं मोठ्या प्रमाणात नुकसान होत आहे.

शेतकरी, बागायतदारांचं आर्थिक नुकसान

डिचोलीत गव्यांचा संचार यापूर्वी तुरळक प्रमाणात दिसत होता, मात्र अलीकडे तो अधिकच वाढला आहे. विशेषतः रात्रीच्या वेळी गवे घरांच्या जवळपास फिरतानाच्या घटनाही समोर आल्या होत्या. काही ठिकाणी गव्यांनी कुंपण आणि भिंतीही तोडल्याच्या घटना घडल्या आहेत.यामुळे नागरिक भयभीत झाले असून, रात्री उशिरा घराबाहेर पडणं टाळत आहेत.

गव्यांच्या हल्ल्यामुळे मोठ्या प्रमाणात शेतकरी व बागायतदारांचं आर्थिक नुकसान झालं आहे. केळी, नारळ, फणस, भाजीपाला यासारखी पिके गव्यांनी उद्ध्वस्त केली आहेत. काही ठिकाणी गवे झाडंही तोडून टाकत असल्यानं झाडांचं मोठं नुकसान झालं आहे.

गव्यांचा बंदोबस्त

स्थानिक नागरिकांनी वनविभागाकडे तक्रार केली असून, गव्यांचा बंदोबस्त करण्याची मागणी केली आहे. वनविभागाने तत्काळ उपाययोजना कराव्यात, अन्यथा अधिक मोठे नुकसान होण्याची शक्यता आहे.

प्रशासनाने या परिस्थितीकडे गांभीर्याने लक्ष देऊन योग्य ती उपाययोजना करावी, अशी मागणी नागरिक आणि शेतकरी करत आहेत.