पणजी: राज्यपालांच्या अभिभाषणावेळी गुरुवारी (०६ फेब्रुवारी) विरोधी आमदारांनी विधानसभेतून सभात्याग केला. मात्र यात गोवा फॉरवर्डचे अध्यक्ष तथा आमदार विजय सरदेसाई सहभागी झाले नाहीत. त्यांनी विधानसभेत राज्यपालांचे भाषण सुरू असताना नोकर भरती घोटाळ्यावर आधारित फलक हातात घेऊन तासभर उभे राहणे पसंत केले.

या वर्षातील हे पहिलेच विधानसभा अधिवेशन असल्याकारणाने त्याची सुरवात राज्यपाल पी. एस. श्रीधरन पिल्लई यांच्या अभिभाषणाने झाली. राज्यपाल भाषण करण्यासाठी उठले, त्याचवेळी विरोधी पक्षनेते युरी आलेमाव यांनी उठून बोलण्यास सुरवात केली.

आलेमाव म्हणाले की, राज्यपाल महोदय आपल्या केरळ राज्यामध्ये विधानसभेचे ५० दिवसाचे अधिवेशन होते. गोवा सरकार मात्र सहा महिन्यांमध्ये दोन दिवसांचे अधिवेशन घेते, हे आपण लक्षात घेतले पाहिजे.

राज्यासमोर सध्या असलेल्या प्रश्नांवर आपण बोलणार आहात का? ढासळती कायदा व सुव्यवस्था म्हादईचा प्रश्न हे आमच्यासाठी महत्त्वाचे विषय आहेत, त्यावर तुम्ही बोलणे अपेक्षित आहे. ते बोलत असतानाच सरदेसाई यांनी फलक फडकवणे सुरू केले.

नोकरेखातीर दी रोख, भाजप सरकाराची एकूच मोख. वोगी रावल्यार सुटलो, आवाज काडटा ताका ठोक, हा मजकूर त्या फलकावर होता. राज्यपालांच्या पूर्ण अभिभाषणावेळी विजय सरदेसाईंकडून वरील फलक हातात घेऊन उभे राहत निषेध करण्यात आला

सल्लागार समितीचा अहवालही फेटाळला

विधानसभा कामकाज सल्लागार समितीचा अहवाल मुख्यमंत्री प्रमोद सावंत यांनी विधानसभेच्या पटलावर ठेवल्यानंतर विरोधकांनी तो फेटाळला. दोन दिवसांचे अधिवेशन घेणे आम्हाला मान्य नाही.

या संदर्भातील मुद्दे बैठकीत मांडले असतानाही इतिवृत्तात आणि अहवालात त्याचा समावेश का केला नाही, अशी विचारणा विरोधी पक्षनेते युरी आलेमाव आणि आमदार विजय सरदेसाई यांनी केली. त्यावर सभापतींनी बैठकीच्या वेळी लेखी पत्र दिले नव्हते असे नमूद केले. यानंतर आवाजी मतदानाने हा अहवाल स्वीकृत करण्यात आला.