Shripad Naik: लोकसभा निवडणुकीला अद्याप ८ महिन्यांचा काळ बाकी असतानाच गोव्यात लोकसभेच्या उमेदवारीवरून रस्सीखेच सुरू झाली आहे.

उत्तर गोवा लोकसभा मतदारसंघातून विद्यमान खासदार आणि केंद्रीय पर्यटन राज्य मंत्री श्रीपाद नाईक यांना डावलल्यास मी निवडणूक लढविण्यास तयार आहे, असे मत मंगळवारी माजी पर्यटन मंत्री दिलीप परूळेकर यांनी व्यक्त केले होते. दरम्यान, यावरून आता श्रीपाद नाईक यांनीही त्यांचे मत व्यक्त केले आहे.

श्रीपाद नाईक म्हणाले की, भाजपमध्ये लोकसभा निवडणुकीसाठी उमेदवार निश्चित्त करण्याचे काम संसदीय मंडळ करत असते. त्यामुळे उमेदवारीवरून कुणीही गैरसमज निर्माण करू नयेत. आगामी लोकसभा निवडणूक लढविण्याची माझी इच्छा आहे. मी तशी तयारीही सुरू केली आहे.

लोकसभेच्या तिकीटाबाबत जे बोलत आहेत ते प्रगल्भ नाहीत. ते जे बोलताहेत त्यांच्या बोलण्याला कसलाही आधार नाही. एखाद्या विद्यमान आमदाराचे तिकीट कापायचे असेल तर त्यासाठी तसेच काहीतरी ठोस कारण असावे लागते किंवा पक्षाची काही एक गरज असावी लागते, असेही श्रीपाद नाईक यांनी स्पष्ट केले.

दरम्यान, मंगळवारी आपल्या वाढदिवसाच्या कार्यक्रमात दिलीप परूळेकर यांनी म्हटले होते की, काही कारणास्तवव श्रीपादभाऊंना तिकीट नाकारल्यास माझ्या नावाचा विचार करावा, असे मी पक्षाला बोललो आहे. हा माझा हट्ट नाही, तर माझी मागणी आहे, असे परूळेकर म्हणाले होते.

यापुर्वीही श्रीपाद नाईक यांनी आगामी लोकसभा निवडणूक लढविणार असल्याचे सांगितले होते. तथापि, काहीजणांकडून लोकसभा निवडणूक लढविण्याबाबत वक्तव्ये केली जात आहेत.