पणजी: पर्ये-सत्तरी (Porvorim) येथे एक हृदयद्रावक घटना घडली आहे. लोककला सादर करताना महिला कलाकाराचा आगीत होरपळून मृत्यू झाला. पार्वती महादेव सावंत (Parvati Sawant) (वय 65) असे त्यांचे नाव आहे. सविस्तर असे की, पर्ये येथील पार्वती सावंत या केरी-सत्तरी येथे लोककला सादरीकरण करत होत्या. या कार्यक्रमात पथकातर्फे ‘धालो’ हा लोककला (folk art) प्रकारात ‘रेमको’ पात्र करण्यासाठी पार्वती यांनी वेशभूषा केली होती. त्याकरिता अंगाभोवती गवत लपेटले होते. कला सादर करताना तिथे असलेल्या समईच्या वातीचा पेट चुकून गवताला लागून आग भडकली.

या आगीत पार्वती 60 टक्के भाजल्या. त्यावेळी काही महिलांनी तेथून पळ काढला तर काहींनी समयसूचकता दाखवत आग आटोक्यात आणली आणि पार्वती यांना तात्काळ रुग्णालयात दाखल केले. मात्र, उपचारादरम्यान त्यांचा मृत्यू झाला. पार्वती सावंत यांच्या पश्चात पती, तीन मुले, दोन मुली असा परिवार आहे. मृत पार्वती सावंत यांचे कुटुंब गरीब आहे. त्या एका नर्सरीत काम करत होत्या. मुलांसह त्यांच्या कमाईवर कुटुंब अवलंबून होते. मात्र, दुर्दैवी घटनेत लोककलाकाराचा मृत्यू झाल्याने सरकारने आर्थिक मदत करावी अशी मागणी होत आहे.

राज्यात ठिकठिकाणी समई नृत्य किंवा अशा प्रकारचे कार्यक्रम होतात. समई नृत्य सादर करताना पेटलेल्या समई डोक्यावर घेऊन वेगवेगळ्या धोकादायक कृती केल्या जातात. त्यामुळे कार्यक्रम आयोजनावेळी सरकारने मार्गदर्शक तत्त्वे घालून देण्याची गरज असल्याचे मत व्यक्त होत आहे.