म्हापसा: गोवा विधानसभा निवडणुकीदरम्यान कार्यरत असलेले पोलिस कर्मचारी निवडणूक भत्ता मिळण्याची प्रतीक्षा करत आहेत. नागरी खात्यातील कर्मचाऱ्यांना हा भत्ता तत्काळ वितरित केला गेला. मात्र, पोलिस कर्मचाऱ्यांना ताटकळत ठेवण्यात आले आहे.

मतदानादिवशी मतदान केंद्रांवर सेवा बजावणाऱ्या कर्मचाऱ्यांना निवडणूक (Election) भत्ता दिला जातो. या भत्त्याच्या वितरणाची जबाबदारी निवडणूक अधिकाऱ्यांची असते. ही रक्कम मतदानचापूर्वीच निवडणूक आयोगामार्फत संबंधित अधिकाऱ्यांकडे सुपूर्द केली जाते.

मतदान केंद्रावरील नागरी सेवेतील कर्मचाऱ्यांना भत्त्याची रक्कम वितरीत करण्यात आली. मात्र काहीच केंद्रांवरील पोलिसांना ही रक्कम मिळाली. उर्वरीत पोलिसांना (Police) ही रक्कम अद्याप देण्यात आलेली नाही. मातदानाला 15 दिवस उलटून गेले तरी पोलिसांना रक्कम मिळालेली नाही. याबाबत अनेक पोलिस कर्मचाऱ्यांनी नाराजी व्यक्त केली आहे. आम्हाला आमच्या हक्काचा भत्ता मिळवण्यासाठी अजून किती दिवस वाट पहावी लागणार, असा प्रश्न पोलिस कर्मचारी विचारात आहेत.