Goa Taxi: मोपा येथील मनोहर आंतरराष्ट्रीय विमानतळावर फ्लाईटमधून उतरलेल्या एका पर्यटकाला मोपा ते बाणावली या टॅक्सी प्रवासात चार हजार हून अधिक रूपये भाडे द्यावे लागले होते. त्या प्रवाशाची टॅक्सी भाड्याची पावती सोशल मीडियात व्हायरल झाली होती. त्यावरून आता राज्याचे वाहतूक मंत्री मॉविन गुदिन्हो यांनी स्पष्टीकरण दिले आहे.

मंत्री गुदिन्हो म्हणाले की, जो मुद्दा खरी समस्या नाही, त्याच मुद्याला मोठे बनविण्याचा प्रयत्न आजकाल काहीजणांकडून सुरू आहे. ज्या पर्यटकाची पेमेंट स्लिप व्हायरल झाली होती, त्याने उच्च श्रेणीची टॅक्सी निवडली होती, त्यामुळे त्या टॅक्सीचे शुल्क जास्त होते. वेगवेगळ्या दरांसह टॅक्सीच्या एकूण 4 श्रेणी आहेत. आम्ही आता एकूण बिलावरील सेवा शुल्क कमी करण्याचा प्रयत्न करू, असे आश्वासनही गुदिन्हो यांनी दिले.

रोहन गोवेकर या प्रवाशाला मोपा ते बाणावली या टॅक्सी प्रवासासाठी तब्बल 4180 रूपये भाडे द्यावे लागले. गोवेकर यांनी त्यांची टॅक्सीच्या प्रवासी भाड्याची रिसीट सोशल मीडियात शेअर केली आणि ती व्हायरल झाली होती. गोवेकर यांनी शेअर केलेल्या रिसीटमध्ये दिसते की मोपा ते बाणावली हे अंतर 65.86 किलोमीटर इतके आहे. यात टॅक्सीचे भाडे 3227.14 रूपये, सर्व्हिस फी 484.07 रूपये, एअरपोर्ट चार्जेस 160 रूपये आणि जीएसटी 161.36 आणि 115.93 रूपये असे मिळून 4148.50 रूपये बिल आले आहे. त्यावर नेटीझन्सकडून विमान तिकीटाचे दर जास्त की टॅक्सीभाडे जास्त असा सवाल केला जात होता.