Mahadayi Water Disputes: केंद्रीय जल आयोगाने म्हादई नदीच्या उपनद्या असलेल्या कळसा-भांडुरा या नद्यांचे पाणी वळविण्याच्या कामाच्या कर्नाटकच्या सुधारीत आराखड्याला मंजुरी दिली आहे. जल आयोगाच्या या निर्णयाचा गोव्याचे जलस्त्रोत मंत्री सुभाष शिरोडकर यांनी निषेध केला आहे. तसेच या निर्णयाविरोधात कोर्टात जाणार असल्याचे म्हटले आहे.

मंत्री सुभाष शिरोडकर म्हणाले की, या निर्णयाविरोधात आम्ही कोर्टात दाद मागू. आमची बाजू मजबूत आहे आणि हे युद्ध आम्ही नक्कीच जिंकू.

दरम्यान, कळसा-भांडुरा योजनेचे काम न्यायालयाच्या स्थगितीमुळे काही काळापासून बंद आहे. म्हादईचा प्रश्न सर्वोच्च न्यायालयात प्रलंबित असतानाही कर्नाटकने कायदे, नियमांची पायमल्ली सुरूच ठेवली होती. खरे तर म्हादईचे पाणी वळविणार नाही, असे आश्वासनही कर्नाटकने न्यायालयात दिले होते. कर्नाटकची ही दुटप्पी नीती आहे. कर्नाटकने नुकतेच म्हादई अभयारण्याजवळ मृदा तपासणी केली होती. विशेष म्हणजे त्यावर गोवा सरकारने कोणतीच कार्यवाही केली नव्हती.

दरम्यान, या मुद्यावर याबाबत बोलताना मुख्यमंत्री डॉ. प्रमोद सावंत यांनी म्हटले होते की, जलस्त्रोत मंत्री सुभाष शिरोडकर यांच्यासमवेत केंद्रीय गृह मंत्री अमित शाह आणि केंद्रीय जल शक्ती मंत्री गजेंद्रसिंह शेखावत यांची भेट घेणार आहे. या भेटीत म्हादईचा प्रश्न मंत्र्यांना समजाऊन सांगणार आहे. गोव्याची भूमिका त्यांच्यासमोर मांडणार आहे. दरम्यान, मुख्यमंत्र्यांनी केंद्रीय जल आयोगाच्या ताज्या निर्णयानंतर म्हादई या विषयावर पुढील धोरण ठरविण्यासाठी सोमवारी 2 जानेवारी रोजी मंत्रीमंडळाची विशेष बैठकही बोलावली आहे.