मडगाव : अवकाळी पावसामुळे गोव्यात शेतकऱ्यांचं मोठं नुकसान झालं आहे. मात्र त्यावरही मात करत प्रतिबंधात्मक उपाय करुन शेतकऱ्यांनी विविध पिकं घेतली आहेत. वेर्णा आणि दक्षिण गोव्यातील काही शेतकऱ्यांनी कलिंगडाच्या शेतीतून नुकसान भरुन काढण्यासाठी प्रयत्न चालवले आहेत. शंभरहून अधिक शेतकऱ्यांनी यावर्षी कलिंगडाची शेती केली असून मागच्या दोन वर्षात कोरोनामुळे झालेलं नुकसान भरुन काढण्यासाठी कंबर कसली आहे. (Watermelon in Goa News Updates)

शेतकऱ्यांचं पावसासोबतच (Rain) कोरोना निर्बंधांमुळे मोठं नुकसान झालं आहे. त्यातच सरकारी मदतही न मिळाल्याने गोव्यातील शेतकरी हवालदिल झाला आहे. यंदा कलिंगडाचं उत्पन्न चांगलं आलं असल्याने शेतकऱ्यांच्या आशा पल्लवित झाल्या आहेत. मात्र शेतकरी अजूनही सरकारी मदतीच्या प्रतिक्षेत आहे. कीटकनाशकांचा योग्य वापर केल्याने पिकांचं नुकसान कमी झालं आहे, तसंच चांगलं उत्पन्नही आल्याने आर्थिक फायदा होईल असा विश्वास शेतकऱ्यांनी व्यक्त केला आहे.

कृषी मंत्री बाबू कवळेकर (Babu Kavlekar) यांनी शेतकऱ्यांना नुकसानभरपाईची घोषणा केली होती. मात्र अद्याप कोणतीही सरकारी मदत न मिळाल्याने शेतकऱ्यांनी नाराजी व्यक्त केली आहे. वेर्णा, माजोर्डा, उतोर्डा येथील शेतकऱी मोठ्या प्रमाणात प्रामुख्याने हंगामी कलिंगडाचं पीक घेतात. या हंगामात कलिंगडाच्या उत्पादनावरच त्यांची उपजीविका चालते. मात्र 2020 मध्ये कलिंगडाच्या पिकावर एका दुर्मिळ रोगाचा प्रादुर्भाव झाला, ज्यामुळे शेतकऱ्यांचं मोठं नुकसान झालं, 2021 मध्येही याच रोगामुळे शेतकऱ्यांच्या (Farmer) हातचं पीक गेलं. यावर्षी रोगावर प्रतिबंधात्मक उपाय केल्यामुळे शेतकऱ्यांमध्ये आशेचं वातावरण आहे.