न्यायप्रविष्ट मोपा लिंक रोडचे काम पोलिस संरक्षणात सुरु

पेडणे : मोपा विमानतळाच्या लिंक रोडचे प्रकरण न्यायप्रविष्ट असताना शुक्रवारी सकाळी पोलिस संरक्षणात बुलडोझर घालून या लिंक रोडचे काम सुरू करण्यात आले आहे. शेतकऱ्यांचा विरोध झुगारुन लिंक रोडचं काम सुरु केल्याने शेतकऱ्यांमध्ये नाराजीचं वातावरण आहे. (Mopa Airport News Updates)

पोलीस संरक्षणात बुलडोझर आणून शेतकऱ्यांची हरकत असलेल्या या लिंक रोडच्या कामासाठी पोलिस संरक्षणात काजूची व इतर झाडे हटवून जमीन सपाटीकरण करण्यास सुरुवात केली.या घटनेची माहिती मिळाल्यावर शेतकरी एकत्रित होऊन घटनास्थळी जमले व पोलीसांच्या नजरेस ही बाब आणून देण्यासाठी चर्चा करत असताना तिथे भूसंपादन अधिकारी चंद्रकांत शेटकर आले आणि त्यांनी कामात अडथळा आणणाऱ्यांना अटक (Arrest) करण्याचा आदेश पोलिसांना दिला.

भू संपादन अधिकाऱ्यांच्या आदेशानुसार पोलिसांनी (Police) तिथे आलेल्या शेतकऱ्यांना तिथून निघून जाण्यास सांगितले. त्यामुळे हतबल झालेले शेतकरी तिथून गेले. यानंतर जेसीबी यंत्राद्वारे अनेक काजू व अन्य झाडे पाडून रस्त्याचे सपाटीकरण केले. शेतकऱ्यांनी व नुकत्याच स्थापन झालेल्या मोपा विमानतळ (Mopa Airport) पंचक्रोशी पीडित जन संघटनेचे अध्यक्ष भारत बागकर यांनी सरकारच्या कृतीचा तीव्र शब्दात निषेध केला आहे.लोकशाहीची ही थट्टा असून हे सरकार हुकुमशाहीचे आहे. लवकरच त्यांना त्याचे उत्तर मिळणार असल्याचे ते म्हणाले.