पणजी शहर स्मार्ट होत असल्याने या शहरासाठी जलपुरवठा करणारी यंत्रणाही नव्याने बसविल्याचे स्पष्ट होत आहे. ओपा येथील जलप्रकल्प केंद्रावर पंप, मोटार, ट्रान्सफॉर्मर, पंप हाऊसची उभारणी अशा बाबी करण्यात आल्या आहेत. त्यासाठी इमेजिन पणजी स्मार्ट सिटी विकास लिमिटेडने (आयपीएससीडीएल) ३५ कोटी ९६ लाख ९५ हजार ९४४ रुपये खर्च केले आहे.

आमदार दिगंबर कामत यांनी विचारलेल्या तारांकित प्रश्‍नावर नगर विकास खात्याच्यावतीने मंत्री विश्‍वजित राणे यांनी लेखी उत्तरात खर्चाचे विवरण दिले आहे. आयपीएससीडीएलने जी पणजी शहरात ३५ कामे सुरू केली आहेत, त्याविषयी कोणता कंत्राटदार नेमला, कोणाला किती पैसे अदा केले, किती टक्के काम पूर्ण झाले याचा सर्व तपशील देण्यात आला आहे.

स्मार्ट सिटीच्या कामांवरून यापूर्वीच गदारोळ सुरू आहे. विलंबाने सुरू झालेली कामे, शहरात साचत असलेले पाणी, कामांच्या दर्जाविषयी पणजीच्या आमदारांनीच उपस्थित केलेले प्रश्‍न यावरून यापूर्वीच्या विधानसभा कामकाजात पडसाद उमटलेले आहेत. या कामांचे ऑडिट करण्याची व श्‍वेत पत्रिका काढण्याची मागणी विरोधकांनी केलेली आहे.

आयपीएससीडीएलने नगर विकास खात्याच्या माध्यमातून जो काही खर्च केला आहे, त्याविषयी निश्‍चित शंका उपस्थित होण्याचीही शक्यता आहे. यापूर्वीच्या पंप हाऊसमधूनच तिसवाडीला तथा पणजीलाही पाणी येत होते. त्यासाठी जी यंत्रणा उभारली होती, ती कालबाह्य झाली होती का? असाही प्रश्‍न आहे. ज्याप्रमाणे कोट्यवधी रुपये खर्च झाले आहेत, त्यावरून शंका उपस्थित झाल्याशिवाय राहणार नाहीत.

हजारो कोटींचा निधी!

पणजी शहराला स्मार्ट करण्यासाठी केंद्राकडून हजारो कोटींचा निधी आला. त्यातील खास करून पणजी शहरासाठी ओपा येथे जलप्रक्रिया प्रकल्पावर पंपहाऊसची निर्मिती, नव्या ट्रान्स्फॉर्मरची उभारणी आणि नव्या मोटारची खरेदी केली गेली आहे. पणजी शहरातून जलवाहिनीही नव्याने टाकण्यात आली आहे.