23 year old youth drowned in Baina sea

बायणा समुद्रकिनाऱ्यावर अंघोळीसाठी गेलेल्या एका युवकाचा बुडून मृत्यू झाल्याची घटना समोर आली आहे. 23 वर्षीय विशाल नाईक हा किनाऱ्यावरील जलक्रीडा करणाऱ्या एका नौकेवर कामाला होता.

हार्बर कोस्टल पोलीस स्थानकाचे निरीक्षक प्रदीप वेळीप यांनी दिलेल्या माहितीनुसार, काल (7 जानेवारी) दुपारच्या सुमारास पर्यटकांना आपल्या नौकेत घेऊन समुद्रात गेला होता. त्यानंतर तो समुद्रात अंघोळीसाठी उतरला.

खोल समुद्रात असलेल्या एका बेटाजवळ तो अंघोळ करत होता. बराच वेळ तो दिसला नाही म्हणून त्याच्या सहकाऱ्यांनी त्याचा शोध सुरू केला असता काही अंतरावर तो तरंगताना दिसला.

त्यानंतर त्वरितच त्याला चिखलीच्या उपजिल्हा रुग्णालयात दाखल करण्यात आले. मात्र तोवर त्याचा मृत्यू झाला होता. विशाल नायक हा मूळचा मध्य प्रदेशमधील असून तो सध्या नेरूलमध्ये राहत होता. दरम्यान, घटनेचा पंचनामा करून मृतदेह मडगावच्या हॉस्पिसिओ रूग्णालयात पाठवण्यात आला आहे. दरम्यान, निरीक्षक प्रदीप वेळीप यांच्या मार्गदर्शनाखाली पुढील तपास सुरू आहे.