मडकई: म्हार्दोळ भागात सध्या पाण्याची टंचाई भासत असून पाणीपुरवठ्यात सातत्य नसल्याने गृहिणींना मनस्ताप सहन करावा लागत आहे.

म्हार्दोळ-सीमेपाईण भागात तर गेल्या महिन्याभरापासून पाण्याचा अनियमित पुरवठा असून लोकांना पाण्यासाठी वणवण करावी लागत आहे. बाहेर धो-धो पाऊस पडत असताना घरात पाण्याची टंचाई असल्याने गृहिणी वैतागल्या असून संबंधित खात्याने पाणीपुरवठा सुरळीत करण्याची जोरदार मागणी करण्यात येत आहे.

गेल्या महिन्यापूर्वी या ठिकाणी अनियमित पाणीपुरवठा होत असल्याने त्यासंंबंधीची तक्रार स्थानिकांनी आमदार तथा राज्याचे कला संस्कृतीमंत्री गोविंद गावडे यांच्याकडे केली होती. त्यावेळी स्वतः मंत्री गोविंद गावडे यांनी त्याची दखल घेत पाणीपुरवठा सुरळीत करण्यासाठी खात्याच्या कर्मचाऱ्यांना आदेश देऊन लोकांना दिलासा दिला होता.

आता पुन्हा एकदा पाण्याचा पुरवठा व्यवस्थित होत नाही. गेल्या रविवारी तर पूर्ण दिवस पाणीच नव्हते. उशिरा पाणी आले. बऱ्याचदा पाणी येते; पण त्याला दाब नसल्याने पाणी वरच्या मजल्यापर्यंत पोहोचत नाही, त्यामुळे संबंधितांनी त्वरित लक्ष घालून येथील पाणीपुरवठा सुरळीत करावा, अशी मागणी स्थानिकांकडून करण्यात येत आहे.