पणजी : गेल्‍या काही दिवसांपासून राज्‍यातील बहुतांश धरण क्षेत्रात मुसळधार पाऊस कोसळत आहे. राज्‍यातील साळावली धरणासह गोवा आणि महाराष्ट्राचा संयुक्‍त प्रकल्‍प असलेले तिळारी धरणही तुडुंब भरले असून, तिळारीतून पाण्याचा विसर्ग सुरू करण्यात आला आहे. या पार्श्वभूमीवर गोवा आणि महाराष्ट्र सीमवेरील गावांना सतर्कतेचा इशारा देण्यात आला आहे.

जलस्रोत खात्‍याने दिलेल्‍या माहितीनुसार साळावली धरण 99 टक्‍के भरले असून, धरणात 23 हजार 160 हेक्‍टर मीटर पाणीसाठा झाला आहे; तर पाण्याची पातळी 41 मीटरपर्यंत पोचली आहे. तिळारी धरण 78 टक्‍के भरले असून, पाणीसाठा 35 हजार 895 हेक्‍टर मीटर इतका झाला आहे. तसेच पाण्याची पातळी 106 मीटरवर पोचली आहे. अंजुणे धरणातील पाणीसाठा 1 हजार ३६ हेक्‍टर मीटर झाला असून, धरण 76.12 टक्‍क्के भरले आहे; तर पाण्याची पातळी 76.12 मीटरवर पोचली आहे. हे धरण केवळ 23 टक्‍केच भरले आहे. चापोली धरणात 875.97 हेक्‍टर मीटर पाणी साठले असून, पाण्याची पातळी 36.15 मीटर इतकी झाली आहे. चापोली धरण सुमारे 78 टक्‍के भरले आहे.

आमठाणे धरणाची पाण्याची पातळी 48 मीटर इतकी झाली आहे. पाणीसाठा 432 हेक्‍टर मीटर झाला आहे; तर धरण सुमारे 72 टक्‍के भरले आहे. पंचवाडी धरणात 383.52 हेक्‍टर मीटर पाणीसाठा असून, पाण्याची पातळी 25.30 मीटरपर्यंत पोचली आहे. पंचवाडी धरण 78 टक्‍के भरले आहे. गावणे धरणात 155.90 हेक्‍टर मीटर पाणीसाठा आहे. त्याची पाण्याची पातळी 62.30 मीटरपर्यंत पोचली आहे. तसेच जलाशय 78 टक्‍के भरला आहे.

दरम्‍यान, धरण क्षेत्रातील गावांना सतर्कतेचा इशारा देण्यात आला आहे. प्रशासनाने आपत्कालीन व्‍यवस्‍था सज्ज ठेवली आहे. स्‍थानिक मामलेदार, पोलिसांची पावसावर नजर असून, आवश्‍यक त्‍या ठिकाणांहून लोकांना सुरक्षित नेण्याचे काम सुरू आहे.

धरण क्षेत्रातील पाऊस

राज्‍यातील धरण क्षेत्रात आज मुसळधार पाऊस झाला. साळावली धरण क्षेत्रात आज शनिवारी चोवीस तासात सर्वाधिक म्‍हणजेच 1,599 मिमी पावसाची नोंद झाली; तर सर्वात कमी अंजुणे धरण क्षेत्रात 1,185.40 मिमी. पाऊस झाला. चापोली धरण क्षेत्रात 1,468.50 मिमी. पाऊस झाला; तर तिळारी धरण क्षेत्रात सुमारे 1,210.60 मिमी. इतका पाऊस झाला. अन्‍य धरण क्षेत्रातील पावसाचे प्रमाण रात्री उशिरापर्यंत उपलब्‍ध झाले नव्‍हते.