म्हापसा: पंचायत या निवडणुकीसाठी महिला तसेच ओबीसीचे अधिसूचित केलेले आरक्षण अयोग्य तसेच संभ्रण निर्माण करणारे असल्याचे मत बार्देश तालुक्यातील अनेक माजी पंचायत सदस्यांनी व्यक्त केले आहे.

प्रभागातील लोकसंख्येवर हे आरक्षण नसल्याने परिणाम होणार असल्याचे मतही काहींनी व्यक्त केले. प्रभागांच्या संख्येनुसार हे आरक्षण नसल्याचे अनेकांचे मत आहे.

(Ward reservation in Goa confusing)

साळगावचे माजी सरपंच एकनाथ ओरस्कर म्हणाले की, मुळात मला ही आरक्षण पद्धतच पटत नाही. तरीही, सरकारने पद्धतशीरपणे आरक्षण जाहीर करण्याची गरज होती. आता जे आरक्षण जाहीर केले आहे, त्यात खूप चूका असल्याचे दिसते. पंचायत निवडणुकीत कोण खरोखर इच्छुक होते, त्यांना ते मारक ठरले आहे. मुळात असे व्हायला नको हवे होते.

आरक्षण योग्य प्रमाणात होण्यासाठी ही निवडणूक पंधरा दिवस लांबणीवर गेली असती तरी चालले असते. कारण, लोकशाहीत प्रत्येकाला निवडणूक लढण्याचा अधिकार आहे. मात्र, अशा चुकीच्या आरक्षणामुळे अनेकांची संधी हुकल्याचे दिसते, असेही ओरस्कर म्हणाले.