पणजी: गोव्याचे माजी रणजी संघ कर्णधार, प्रशिक्षक, तसेच आता भारतीय क्रिकेट नियामक मंडळाच्या (बीसीसीआय) सामनाधिकारी मंडळाचे सदस्य असलेले विवेक कोळंबकर येत्या ऑक्टोबरमध्ये आंतरराष्ट्रीय क्रिकेट सामनाधिकारी बनतील. असा मान मिळविणारे ते पहिले गोमंतकीय ठरतील.

ऑस्ट्रेलियाचा १९ वर्षांखालील क्रिकेट संघ सप्टेंबर-ऑक्टोबरमध्ये भारत दौऱ्यात तीन एकदिवसीय आणि दोन मल्टि-डे (युवा कसोटी) सामने यजमान संघाविरुद्ध खेळेल. मल्टि-डे मालिकेतील दुसऱ्या सामन्यासाठी ‘बीसीसीआय’ने ४९ वर्षीय कोळंबकर यांची सामनाधिकारी म्हणून नियुक्ती केली आहे. हा चार दिवसीय सामना ५ ते ८ ऑक्टोबर या कालावधीत अहमदाबाद येथे खेळला जाईल.

गोव्याचे तंत्रशुद्ध, शैलीदार फलंदाज ही ओळख असलेले डावखुरे फलंदाज विवेक कोळंबकर यांनी राज्याचे प्रथम श्रेणी क्रिकेटमध्ये १९९५-९६ ते २००५-०६ या कालावधीत प्रतिनिधित्व केले. ते ४० रणजी सामने, तर २७ लिस्ट ए (एकदिवसीय) सामने खेळले. रणजी करंडक क्रिकेट स्पर्धेत त्यांनी १६०८ धावा करताना दोन शतके व सहा अर्धशतकांची नोंद केली. त्यांनी रणजी स्पर्धेत हैदराबादविरुद्ध १०६ धावांची, तर सौराष्ट्रविरुद्ध १२० धावांची खेळी केली होती.

आंतरराष्ट्रीय सामनाधिकारी म्हणून बीसीसीआयने नियुक्ती केल्याबद्दल गोवा क्रिकेट असोसिएशनचे (जीसीए) अध्यक्ष महेश देसाई, सचिव तुळशीदास शेट्ये आणि व्यवस्थापकीय समितीने विवेक कोळंबकर यांचे अभिनंदन केले असून त्यांना सुयश चिंतिले आहे. कोळंबकर सध्या ‘प्रोव्हिडंट फंड’च्या गोवा विभागात कार्यरत असून जीसीएच्या सामनाधिकारी जबाबदारीतही सक्रिय असतात.

दशकभराची कारकीर्द

निवृत्तीनंतर कोळंबकर बीसीसीआयच्या सामनाधिकारी परिक्षेत उत्तीर्ण झाले आणि या भूमिकेत २०१७-१८ पासून कारकिर्दीस सुरवात झाली. सुरवातीस ज्युनियर वयोगटातील स्पर्धांत सामनाधिकारी म्हणून ठसा उमटविल्यानंतर त्यांना ‘बीसीसीआय’ने २०२२-२१ मध्ये बढती दिली. तेव्हापासून त्यांनी १० प्रथम श्रेणी क्रिकेट सामन्यात, ७ लिस्ट ए, तर २४ टी-२० सामन्यांत सामनाधिकारी या नात्याने योगदान दिले आहे. जानेवारी २००६ मध्ये हिमाचल प्रदेश विरुद्ध जम्मू-काश्मीर यांच्यातील रणजी सामन्यात ते सामनाधिकारी होते.