Vithalapur Karapur Theft News

डिचोली: डिचोलीत चोरट्यांनी धुमाकूळ घातला असतानाच मध्यरात्री विठ्ठलापूर-कारापूर येथे एका घरात चोरीचा अयशस्वी प्रयत्न झाला. मात्र, घरातील महिलांच्या सतर्कतेमुळे मध्यरात्री घराच्या छपरावर चढलेल्या एका संशयित युवकाला पकडण्यात स्थानिकांना यश आले.

पळ काढताना पकडल्यानंतर स्थानिकांनी संशयिताला पोलिसांच्या ताब्यात दिले. पोलिस या संशयित युवकाबद्दल चौकशी करत आहेत. मात्र, पळण्याच्या प्रयत्नात छपरावरून खाली पडल्याने संशयित युवक काही प्रमाणात जखमी झाल्याची माहिती मिळाली आहे.

संशयित युवक विठ्ठलापूर भागातील नसल्याची माहिती मिळाली आहे. त्यामुळे चोरी करण्याच्या उद्देशानेच तो घरावर चढला असावा, या संशयाला पुष्टी मिळत आहेत. या युवकाबद्धल पोलिसांनी माहिती उघड केली नसून, त्याच्याबरोबर आणखी कोण होते का, त्यादृष्टीने पोलिस तपास सुरू आहे.

युवकासोबत साथीदार असण्याची शक्यता!

विठ्ठलापूर येथील एका घरात कैसरे कुटुंब भाड्याने राहत आहे. मध्यरात्री एक वाजण्याच्या सुमारास छपरावर आवाज ऐकू येऊ लागल्याबरोबर गौरी कैसरे या महिलेने जवळच राहणाऱ्या त्यांच्या नणंदेला मोबाईलवरून फोन केला. गौरी त्यांची नणंद आणि अन्य महिला बाहेर आल्या.

आरडाओरड करताच, पळून जाण्याच्या प्रयत्नात संशयित युवक घराच्या छपरावरून खाली पडला. तोपर्यंत शेजारी उठले आणि त्यांनी संशयित युवकास पकडले. या युवकाबरोबर त्याचे साथीदार होते आणि ते पळून गेले असावेत, असा संशय गौरी कैसरे आणि अन्य महिलांनी व्यक्त केला आहे.