पणजी: बांबोळी येथील गोवा वैद्यकीय महाविद्यालयात (गोमेकॉ) रुग्णांना अत्याधुनिक सेवा देण्यासाठी सरकार सतत प्रयत्न करीत आहे. लवकरच गोमेकॉत अत्याधुनिक मॉलिक्युलर लॅब आणि अतिरिक्त कॅथ लॅब सुरू करणार असल्याची माहिती आरोग्य मंत्री विश्वजित राणे यांनी दिली. ही सेवा सुरू झाल्यावर रुग्णांची निदान संख्या आणि हृदयविकाराच्या रुग्णांमध्ये प्रगत प्रक्रिया वाढणार असल्याचा विश्वास मंत्र्यांनी व्यक्त केला आहे.

मंत्री राणे हे सतत राज्यातील जनतेच्या आरोग्याशी आपण कधीच खेळ करणार नाही आणि त्यांना हवी असलेली अत्याधुनिक सुविधा पुरविणार असल्याचे सांगत आले आहेत. त्यादृष्टीने त्यांनी कामही सुरू केलेले आहे. आजवर ‘गोमेकॉ‘त त्यांनी अत्याधुनिक मशीन आणून रुग्णांवर होणारे उपचार कसे लवकर होतील आणि त्यांना तपासणीचा अहवाल देखील लवकर कसा मिळेल, याकडे स्वतः लक्ष पुरविले आहे.

मंत्री राणे यांनी सांगितले की, गोमेकॉत लवकरच अत्याधुनिक मॉलिक्युलर लॅब आणि अतिरिक्त कॅथ लॅब सेवा सुरू होणार आहे. या नवीन सुविधांमुळे रुग्णांवरील उपचारांचे निदान लवकर होण्यास मदत होईल. याव्यतिरिक्त हृदयविकाराच्या प्रगत प्रक्रिया करण्याच्या क्षमतांमध्ये लक्षणीय वाढही होणार आहे.