डिचोली: स्थलांतरित मालमत्तेच्या विळख्यात मयेवासीय कित्‍येक वर्षे अडकून पडले आहेत. त्‍यांना न्याय मिळवून देण्यासाठी सरकार पूर्णपणे असमर्थ ठरले आहे, असा आरोप गोवा फॉरवर्डचे नेते आमदार विजय सरदेसाई यांनी केला. ‘गोंय आणि गोंयकारपण’ सांभाळून ठेवण्यासाठी गोवा फॉरवर्ड कटिबद्ध आहे, असेही ते म्‍हणाले.

मये जिल्हा पंचायत मतदारसंघातील गोवा फॉरवर्डच्या उमेदवार प्रा. राधिका राजेश कळंगुटकर यांच्या प्रचारकार्यासाठी मये येथे आले असता सरदेसाई पत्रकारांशी बोलत होते. ते म्‍हणाले, एका बाजूने सरकारने ‘माझे घर’ योजना पुढे आणली तर दुसऱ्या बाजूने मयेवासीयांच्या जमिनी हडप करण्याचे कारस्थान सुरू आहे.

खनिज व्यवसायामुळे मयेतील लोक धूळ खात आहेत. मात्र सरकारला लोकांच्‍या या दुखण्याचे काहीच पडलेले नाही. उलट खाणमालकांना प्राधान्‍य दिले जात आहे. स्थानिक प्रश्‍‍नांना वाचा फोडून जनतेला न्याय मिळवून देण्यासाठी गोवा फॉरवर्ड संघर्ष करणार आहे. तेव्हा जनतेने गोवा फॉरवर्डच्या मागे खंबीरपणे उभे रहावे. मये मतदारसंघात गोवा फॉरवर्डची ताकद वाढली असून, झेडपी उमेदवार निश्चित निवडून येईल, असा विश्‍‍वास सरदेसाई यांनी व्‍यक्त केला.

श्री केळबाईचा आशीर्वाद घेऊन प्रचार

उमेदवार प्रा. राधिका कळंगुटकर यांच्यासह केळबायवाडा-मये येथील श्री केळबाई देवीचे दर्शन घेऊन विजय सरदेसाई यांनी मयेतील प्रचारकार्याला प्रारंभ केला. यावेळी त्यांच्यासमवेत गोवा फॉरवर्डचे दुर्गादास कामत, संतोषकुमार सावंत, मंदार सरदेसाई, मये गट समितीचे अध्यक्ष वीरेंद्र पत्रे, आनंद पार्सेकर, प्रा. राजेश कळंगुटकर तसेच शंभरहून अधिक कार्यकर्ते उपस्‍थित होते. निवडून आल्यास मतदारसंघाचा विकास करण्यास मी कार्यरत राहीन, अशी ग्वाही प्रा. राधिका कळंगुटकर यांनी दिली.

भाजप सरकारच्या हुकूमशाहीला जनता कंटाळली आहे. जनतेला बदल हवा आहे. भाजपला पदच्‍युत करण्यासाठी विरोधकांनी एकत्र येणे आवश्यक आहे. त्यासाठी युतीचा प्रस्ताव पुढे आला आहे. आता युतीबाबतचा चेंडू काँग्रेसच्या कोर्टात आहे. मये मतदारसंघात गोवा फॉरवर्डने यापूर्वीच प्रचार सुरू आहे. त्यामुळे या मतदारसंघातून गोवा फॉरवर्ड निवडणूक लढवणारच.

- विजय सरदेसाई, आमदार (गोवा फॉरवर्ड)