पणजी: ‘आमदार सुदिन ढवळीकर यांना थट्टेने मी ‘मराठी नको, कोकणीत बोला’, असे म्‍हटले होते. माझ्‍या वक्‍तव्‍यामुळे कुणी दुखावले असल्‍यास ‘सॉरी’ म्‍हणण्‍यात काही गैर नाही’, असे आमदार विजय सरदेसाई यांनी आज विधानसभा सदनात स्‍पष्‍ट केले.

‘सुदिन ढवळीकर यांच्‍यासोबत आपले स्‍नेहाचे संबंध आहेत. सदनात बऱ्याच सदस्‍यांना कोकणी समजते, म्‍हणून आपण ‘कोकणीतून बोला’, असे विधान केले. राजभाषा अधिनियमानुसार मराठीचे स्‍थान, वापरामागील उद्देश मला ज्ञात आहे.

मी सर्व भाषांचा आदर करतो. मराठी भाषेला श्रीमंती, समृद्ध वारसा, संस्‍कृतीचे अधिष्‍ठान आहे. माझ्‍या वक्‍तव्‍याचा अन्‍य अर्थ काढला गेला’, असेही अखेरीस सरदेसाई म्‍हणाले. मराठी विषयावरून केलेल्‍या वक्‍तव्‍यामुळे मराठीप्रेमींमध्‍ये नाराजीचे वातावरण होते. त्‍या पार्श्वभूमीवर सरदेसाई यांनी आज उपरोक्‍त स्‍पष्‍टीकरण दिले आहे.