पणजी : वेर्णा येथील नागरिकांनी गुरुवारी गोवा सोलि़ड व्हेस्ट मॅनेडमेंट कोर्पोरेशनच्या अधिकाऱ्यांची भेट घेऊन वेर्णा येथे कचरा प्रक्रिया प्रकल्पाला विरोध दर्शविला. हा प्रकल्प वेर्णा येथे सुरु केल्यास येथील 174 बोअर विहिरी, 32 नैसर्गिक पाण्याचे झरे तसेच 28 विहिरी नष्ट होतील अशी भीती नागरीकांनी व्यक्त केली.

तत्पुर्वी हे नागरिक कचरा व्यवस्थापन मंत्री बाबुश मोन्सेरात यांना भेटले आणि त्यांनी बाबूश यांच्यासमोर आपली कैफियत मांडली. गेल्या महिन्यात झालेल्या ग्रामसभेतही नागरिकांनी कचरा प्रक्रिया प्रकल्पाला विरोध करण्याचा निर्णय घेतला होता. मंत्र्यांनी या नागरिकांना जीएसडबल्यूएमसीच्या अधिकाऱ्यांना भेटण्यास सांगितले. तसेच या अधिकाऱ्यांना वेर्णा औद्योगिक वसाहतीतील प्रस्तावित कचरा प्रक्रिया प्रकल्पाचे त्यांना सादरीकरण करुन दाखविण्यास सांगितले. मात्र हे सादरीकरण पाहूनही नागरिक समाधानी झाले नाहीत.

या प्रकल्पाबद्दल लोकांच्या मनात भीती आहे. तसेच काही प्रश्नही आहेत, जे आम्ही अधिकाऱ्यांसमोर मांडले आहेत असे जॉन फिलीप परेरा याने सांगितले. मात्र जीएसडबल्यूएमसीचे व्यवस्थापकीय संचालक लेविसन मार्टिन्स आमच्या बोअर विहिरी, झरे आणि विहिरी संदर्भातील प्रश्नांना समर्पक उत्तर देऊ शकले नाहीत, असे त्यांनी सांगितले.