पणजी: वेर्णा औद्योगिक वसाहतीमध्ये २५ मे रोजी रात्री बसखाली सापडून मृत्यूमुखी पडलेल्या चार मजुरांपैकी तीन मजुरांच्या वारसांना प्रत्येकी १३ लाख ६० हजार रुपयांची भरपाई द्यावी, असा आदेश आज कामगार आयुक्त डॉ. लेविन्सन मार्टिन्स यांनी जारी केला. ३० दिवसांत ही भरपाई अदा न केल्यास १२ टक्के व्याजासह ती द्यावी लागेल, असेही त्यांनी आदेशात नमूद केले आहे.

त्यांनी हा आदेश कुद्रोली बिल्डर्स अॅण्ड इन्फास्ट्रक्चर्स आणि सार्वजनिक बांधकाम खात्याचे विभाग १४ च्या कार्यकारी अभियंत्यावर बजावला आहे. त्यांनी रमेश महातो, विनोदसिंह, राजेंद्र महातो यांच्या वारसांना भरपाई द्यायची आहे. मजूर अनिल महातो याच्या वारसांना भरपाई देण्याविषयी कामगार आयुक्त सोमवारी निर्णय घेण्याची शक्यता आहे.

त्या मजुरांच्या वारसांना शोधण्याचा प्रयत्न आधी फोल ठरला होता. बिहारमधील कामगार आयुक्तांनाही पत्र पाठवण्यात आले होते. कुणीच त्यांच्या वारसांना शोधू शकले नाही. यामुळे भरपाईची रक्कम सरकारी गंगाजळीत जमा होण्याची वेळ आली होती.

डॉ. मार्टिन्स गरीब कुटुंबीयांना आपण मदत देऊ शकत नाही, असा विचार करून व्यथित झाले होते. त्यांनी ही सल आपल्या एका मित्राला बोलून दाखवली. त्या मित्राने सामाजिक कार्यकर्ते कुमार कलानंद मणी यांच्या कानी घातली. याआधी एका कंपनीतील स्फोटात मरण पावलेल्या महाराष्ट्रातील दोन कामगारांना प्रत्येकी १२ लाख रुपयांची भरपाई डॉ. मार्टिन्स यांनी मिळवून दिली होती.

मजुरांच्या कुटुंबीयांचा शोध

हे सर्व मजूर बिहारमधील होते. बस अपघातात त्यांचा मृत्यू झाला आहे. या घटनेनंतर कामगार आयुक्त डॉ. लेविन्सन मार्टिन्स यांनी या मजुरांच्या वारसांचा शोध घेण्यासाठी बिहारमध्ये विशेष मोहीम राबवली. सामाजिक कार्यकर्ते कुमार कलानंद मणी यांच्या मदतीने स्थानिक सामाजिक कार्यकर्ता अभिषेक कुमार यांच्याशी संपर्क साधून ते वारसांना शोधण्यात यशस्वी झाले. त्यानंतर २४ मे रोजी कुटुंबीय गोव्यात दाखल झाले आणि भरपाई देण्याची प्रक्रिया सुरू झाली होती.