मडगाव: वेर्णा येथे ह्युजेस प्रेसिजन या काडतुसे बनविणाऱ्या कारखान्‍यात शनिवारी जी आग लागण्‍याची घटना घडली, त्‍यासंदर्भात लवकरच केंद्रीय गृहमंत्रालयाला जिल्‍हा प्रशासनाकडून अहवाल दिला जाणार आहे, अशी माहिती दक्षिण गोव्‍याच्‍या जिल्‍हाधिकारी ॲग्‍ना क्‍लिटस यांनी दिली.
शनिवारी झालेल्‍या या आगीच्‍या दुर्घटनेत या कारखान्‍यात असलेला सुमारे २५० किलो दारुगोळा जळून नष्‍ट झाला असा प्राथमिक अंदाज व्‍यक्‍त केला जात आहे. सध्‍या या कारखान्‍यातील उत्‍पादन बंद ठेवण्‍यात आले आहे.
या कारखान्‍यात बंदुकीला लागणारी काडतुसे बनविली जात असून त्‍यासाठी या दारुगोळ्याचा वापर केला जात होता. शनिवारी पहाटे अकस्‍मात या कारखान्‍याला आग लागण्‍याची घटना घडली. विजेच्‍या शॉर्ट सर्किटमुळे ही आग लागली असावी असा प्राथमिक अंदाज व्‍यक्‍त करण्‍यात आला होता. त्‍यानंतर या दुर्घटनेची दक्षिण गोवा जिल्‍हा प्रशासनाने चौकशी सुरू केली हाेती.
वेर्णा पोलिस स्‍थानकाचे निरीक्षक आनंद शिरोडकर यांनीही या दुर्घटनेनंतर या कारखान्‍यात जाऊन चौकशी केली हाेती. आत्तापर्यंत आम्‍हाला जी प्राथमिक माहिती मिळाली, त्‍याप्रमाणे सुमारे २५० किलो दारुगोळा त्‍यावेळी या कारखान्‍यात होता. त्‍याशिवाय काडतुसांची कित्‍येक रिकामी खोकी कारखान्‍यात होती. हा माल हाताळताना या कारखान्‍याने पुरेसे सुरक्षेचे उपाय घेतले होते का याचीही चौकशी आम्‍ही करत आहोत. अग्निशमन दलाकडूनही यासंदर्भात वेगळी चौकशी केली जाणार असल्‍याची माहिती त्‍यांनी दिली.
जिल्‍हाधिकारी क्‍लिटस म्हणाले, की सुरुवातीला आम्‍ही इंधन आणि स्‍फोटक सुरक्षा (पेसो) मंडळाकडे संपर्क साधला होता. मात्र, या कंपनीला केंद्रीय गृहमंत्रालयाकडून परवाना मिळाला असल्‍याने यासंबंधीची चौकशी गृहमंत्रालयाच्‍या अखत्‍यारित येत असल्‍याने आम्‍ही आमचा अहवाल मंत्रालयाला पाठविणार अशी माहिती त्‍यांनी दिली. यापूर्वी याच कंपनीच्‍या बेतूल येथील गोदामाला आग लागली होती. त्‍यावेळी त्‍या दुर्घटनेवेळी या गोदामात सुमारे ११ टन दारुगोळा साठवून ठेवला होता.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.