वास्को: वेर्णा येथे युनियन बँकेसमोर रविवारी (ता. २७) दुपारी झालेल्या स्वयंअपघातात दुचाकीच्‍या मागे बसलेला मिथुन कुमार रावनी (३०) हा युवक जागीच ठार झाला.

तर, दुचाकीचालक रितेश बेडिया (३०) हा गंभीर जखमी झाला असून त्याला उपचारासाठी गोमेकॉत दाखल करण्‍यात आले आहे. त्‍याने मद्यप्राशन केले होते.

वेर्णा पोलिसांनी दिलेल्या माहितीनुसार, मूळचे झारखंडचे परंतु कामानिमित्त वेर्णा येथे राहणारे रितेश बेडिया व मिथुन कुमार रावनी दुपारी मोटरसायकलने मडगावहून वेर्णा चर्चकडे चालले होते.

दुचाकीस्‍वार रितेश याने मद्यप्राशन केले होते. तरीसुद्धा त्‍याने आपल्यासोबत मिथुनला घेतले. दोघेही वेर्णा येथे युनियन बँकेसमोर पोहोचले असता रितेशचा दुचाकीवरील ताबा सुटला व ते दोघेही रस्त्यावर फेकले गेले.

या अपघातात मिथुन कुमार याला गंभीर इजा झाल्‍याने तो जागीच ठार झाला. पोलिसांनी अपघाताचा पंचनामा करून रितेश बेडिया याच्याविरोधात गुन्हा दाखल केला आहे.