मडगाव: वार्का येथे एका हॉटेलबाहेर झालेल्या वादानंतर एका युवकाचे अपहरण करून त्याला बेदम मारहाण करून नंतर एकीकडे सोडून देण्याच्या आरोपाखाली कोलवा पोलिसांना हवा असलेला मुख्य संशयित वॉल्टर फर्नांडिस (वय ३६, राय) याच्यासह त्याचा साथीदार युवकेश सिंग बदयला (वय १८, पाजीफोंड - मडगाव) या दोघांना अटक केली.

ही अपहरणाची घटना १९ सप्टेंबर २०२४ या दिवशी घडली होती. वॉल्टर आणि त्याच्या अन्य साथीदारांनी त्या युवकाला लाथा बुक्क्यांनी मारहाण केली, तर काही जणांनी त्याच्यावर सळ्यांनी वार केले होते. नंतर त्याला एका गाडीत कोंबून त्याचे अपहरण केले होते.

नंतर त्याला एका ठिकाणी टाकून देऊन हल्लेखोर फरार झाले होते. त्यापैकी एका संशयिताला पोलिसांनी अटक केली होती, पण इतर संशयित फरार झाले होते.

पोलिसांकडून मिळालेल्या माहितीनुसार, संशयित वॉल्टर फर्नांडिस याची पार्श्वभूमी गुंड प्रवृत्तीची असून त्याच्या विरोधात यापूर्वी कोलवा पोलिसात दोन, तर फातोर्डा पोलिस स्थानक आणि मायणा कुडतरी पोलिस स्थानकात प्रत्येकी एक गुन्हा नोंद करण्यात आला आहे.