मोरजी: शेकडो बिगरगोमंतकीय युवकांना महाराष्ट्रातील वाहने पत्रादेवी चेकनाक्यावर दरदिवशी पहाटे 5 वाजल्यापासून आणून सोडतात. तेथून हे युवक अबकारी नाका ते पोलिसनाक्यापर्यंत चालत येतात. पोलिसनाक्यावर त्यांची दोन मिनिटांसाठी तपासणी केली जाते. नंतर त्यांना गोव्यातील काही वाहने नेण्यासाठी येतात. हे युवक मजूर असावेत, पण ते नक्की कुठे जातात, हे मात्र कोणालाच माहीत नाही. (Vehicles from Maharashtra drop off hundreds of non-Gomantak youth at Patradevi Check Naka from 5 am)

उच्च न्यायालयाच्‍या आदेशानुसार, कोरोनाप्रतिबंधक दोन डोस घेतलेल्‍यांना एका राज्‍यातून दुसऱ्या राज्‍यात जाता येते. पत्रादेवी चेकनाक्‍यावर मोठ्या प्रमाणात परराज्यांतील युवक जमा होतात. महाराष्‍ट्रातील काही वाहने त्यांना नाक्यावर सोडून परत माघारी फिरतात. मग हे युवक पोलीस चेकनाक्यावर थांबतात व दोन-दोन मिनिटांनी पुढे पुढे जातात. या दोन मिनिटांत त्‍यांची कसली तपासणी होते, हा संशोधनाचा विषय ठरावा. आणि हे मजुरांचे लोंढे जातात कुठे, हे सुद्धा कळायला मार्ग नाही. ज्यांनी दोन डोस घेतलेले नाहीत, तेही थेट गोव्‍यात प्रवेश करत आहेत. केरळमधून प्रवास करणाऱ्या लोकांना गोवा राज्यात प्रवेश करण्यासाठी नकारात्मक RT-PCR अहवाल दाखवावा लागतो.