Vasco Traffic News: वास्को शहरात बसवलेले सुमारे 62 सीसीटीव्ही कॅमेरे निकामी झाले आहेत. त्यामुळे पोलिसांच्या तपासात अडथळे येत असल्याचे पोलिसांचे म्हणणे आहे. हे कॅमेरे वास्कोतील प्रमुख चौकांमध्ये बसवले आहेत; परंतु त्यांच्या स्थितीमुळे वाहतुकीच्या देखरेखीवर परिणाम झाला आहे.

सीसीटीव्ही कॅमेरे स्थानिक क्षेत्र विकास योजनेंतर्गत निश्चित बसवण्यात आले होते. मात्र आता हे सीसीटीव्ही बंद असण्याबाबत स्थानिकांनी सांगितले. वर्दळीचे ठिकाण असलेल्या वास्को शहरात 24X7 कार्यात्मक सीसीटीव्ही असणे आवश्यक आहे असे, मत नागरिकांनी व्यक्त केले आहे.

काही दिवसांपूर्वी एका 79 वर्षीय इसमाचा अपघात घडला होता. जर वाहतुकीवर पाळत ठेवणारी यंत्रणा कार्यान्वित असती, तर त्या इसमाला धडक देणाऱ्या कार ड्रायव्हरला पोलिस अटक करू शकले असते, असे एका स्थानिकाने सांगितले.

मुरगाव नगरपरिषदेने (MMC) हे सीसीटीव्ही कॅमेरे ताबडतोब दुरुस्त केले पाहिजेत, असे वास्को वाहतूक सेलचे प्रभारी शैलेश नार्वेकर यांनी सांगितले. याबाबत MMC चेअरपर्सन गिरीश बोरकर म्हणाले की, त्यांनी वास्कोचे आमदार कृष्णा साळकर यांच्याकडेही याबाबत चर्चा केली आहे आणि लवकरच पोलिस आणि वाहतूक सेलची याबाबत बैठक घेतली जाणार असून शहरातील ही समस्या तातडीने सोडवण्यात येईल.