2022 मध्ये वास्को परिवहन विभागाकडे दुचाकी, चारचाकी वाहनांसह एकूण 5399 वाहनांची नोंदणी करण्यात आली. त्यापैकी 160 दुचाकी व चारचाकी वाहनधारकांनी त्यांच्या वाहनांसाठी फॅन्सी क्रमांक घेतले असून वास्को आरटीओला यामधून तब्बल 66 लाख 59 हजार 59 हजार रुपयांची कमाई झाल्याची माहिती वाहतूक विभागाचे अतिरिक्त संचालक राजेश नाईक यांनी दिलीय.

यासंदर्भात नाईक म्हणाले "गोव्यातील काही लोक त्यांच्याकडील जुन्या गाडीचा नंबर लकी नंबर मानतात आणि तोच नंबर घेतात. काहीजण स्वतःच्या, आई-वडिलांच्या, मुलांच्या वाढदिवसाची तारीख, लग्नाची तारीख निवडतात.

तर काहीजण 1111, 7777, 1234 अशा सीरिजचे व्हीआयपी नंबर घेतात. 2021 मध्ये वास्कोमध्ये 108 लोकांनी नवीन वाहन नोंदणी करतेवेळी त्यांच्या आवडीचा क्रमांक घेतला. त्यासाठी एकूण 33,24,000 रुपये शुल्क आकारण्यात आले होते.

लोकांना त्यांच्या पसंतीचा क्रमांक निवडण्यासाठी 35,000 रुपये शुल्क भरावे लागते. 2022 मध्ये एकूण 5399 नवीन वाहनांची नोंदणी करण्यात आली आहे. यामध्ये 3437 दुचाकी, 1518 चारचाकी, 218 टॅक्सी आणि 226 इतर वाहनांचा समावेश असल्याची माहिती नाईक यांनी दिली.