वास्को : गोवा राज्यातील किनारी भागात रात्री 10 नंतर कोणत्याही प्रकारची संगीत पार्टी आयोजित करण्यावर उच्च न्यायालयाने निर्बंध घातले आहेत. मात्र राज्यातील काही किनाऱ्यावर हे प्रकार सुरु असल्याने आज वास्को पोलिसांनी स्थानिक हॉटेल, रेस्टॉरंटचे मालक व व्यवस्थापक यांच्यासोबत आज बैठक घेत संगीत पार्टी बंदसाठी आवाहन केले. यावेळी उपस्थितांनी सहकार्य करण्याचे आश्वासन दिले.

( Vasco police held a meeting to prevent night music parties from being organized in coastal areas of Goa state )

कर्णकर्कश ध्वनीप्रदूषणसंबंधी घटनांची गंभीर दखल घेत न्यायालयाने ध्वनिप्रदूषण रोखण्याचे निर्देश राज्य सरकारला दिले आहेत. यावरुन घेतलेल्या बैठकीदरम्यान पोलिसांनी संबंधितांना योग्य माहिती दिली.

यावेळी काही घरमालकांनी आपल्या भाडेकरूसंबंधी पोलिसांकडे पडताळणी अर्ज दाखल केले नव्हते, अशा सात घरमालकांविरोधात मुरगाव उपजिल्हाधिकारी कार्यालयाला अहवाल पाठविण्यात आल्याची माहिती पोलिसांनी यावेळी दिली.

या बैठकीदरम्यान पोलिस म्हणाले की, घरमालक आपल्या खोल्या भाड्याने देतात. परंतु, भाडेकरूंची माहिती पोलिसांना देण्यासंबंधी गंभीर नसतात. त्यांना वारंवार आवाहन करूनही ते सतत दुर्लक्ष करीत असतात. त्यामुळे एखाद्या गुन्हेगार भाडेकरूसंबंधी माहिती मिळण्यास अडचण होते.

जर घरमालकांनी भाडेकरूची माहिती दिल्यास त्यासंबंधी त्या भाडेकरूची माहिती त्याच्या मूळच्या राज्यातून मागविणे सोपे जाते. परंतु, दुर्दैवाने तसे होत नसल्याचे पोलिसांनी म्हटले आहे. तसेच यापुढे अशा मालकांवर कारवाई होणार असल्याचे म्हटले आहे.