वास्को: येथील नवीन मासे मार्केटात भाजी, फळे, नारळ व इतर विक्रेत्यांनी स्थलांतर केल्यावर साळगावकर इमारतीसमोरचा अंतर्गत रस्ता वाहतुकीसाठी सुरळीत झाल्याने वाहनचालकांनी समाधान व्यक्त केले आहे.

एफ. एल. गोम्स मार्गावर असलेल्या फळ विक्रेत्यांनाही नवीन मासे मार्केटात स्थलांतर करण्यात येणार असल्याचे समजते. त्यामुळे एफ. एल गोम्स मार्गावरची वाहतूक सुरळीत होण्यास हातभार लागणार आहे.

नवीन मासे मार्केटात मासे विक्रेत्यांनी आपला व्यवसाय मंगळवारपासून सुरू केला आहे. त्यामुळे एफ. एल. गोम्स मार्गावर उभ्या करण्यात येणाऱ्या वाहनांची गर्दी कमी झाली झाल्याने तेथील वाहतूक सुरळीत झाली आहे.

मासळी विक्रेत्यांनी नवीन मार्केटात स्थलांतर केल्यावर, तेथील पदपथ, रस्त्यावर भाजी, फळे व इतर वस्तू विकणाऱ्या विक्रेत्यांनी बुधवारी त्या मार्केटात स्थलांतर केले आहे. त्यामुळे तेथील पदपथ व रस्त्याकडेची जागा मोकळी झाली आहे. त्यामुळे साळगावकर इमारतीसमोरच्या अंतर्गत रस्त्यावरील वाहनाची ये-जा सुरळीतपणे होत आहे.

त्या विक्रेत्यांचीही सोय व्हावी

नवीन मासे मार्केट अधिसूचित करण्यात आल्याने त्या मार्केटापासून एक किलोमीटर व्यासाच्या परिसरात कोणीही कोणत्याही पद्धतीने मासे विक्री करण्यास प्रतिबंध आहे.

मात्र येथील टी. बी. कुन्हा चौकातून भाजी मार्केटात जाणाऱ्या रस्त्यावर सुमारे आठ दहा महिलांनी अतिक्रमण करून मासे विकतात. त्यामुळे तेथे वाहतुकीला अडथळा निर्माण होत आहे. याकड मुरगाव पालिकेने लक्ष देण्याची गरज आहे. या विक्रेत्यांविरोधात यापूर्वी कारवाई करण्यात आली होती. मात्र त्या पुन्हा तेथे मासे विक्री करतात. त्यांची सोय करावी अशा प्रतिक्रिया व्यक्त होत आहेत.