वास्को: येथील मॉडर्न मार्केटमधील दुकानदारांनी आज सकाळी आपली दुकाने बंद ठेवून पदपथावर बेकायदा विक्री करणाऱ्या विक्रेत्यांवर कारवाई करावी, अशी मागणी केली. पालिकेने दुकानदारांना त्या बेकायदा विक्रेत्यांवर कारवाई करण्याचे आश्वासन दिल्यानंतर माॅर्डन मार्केटमधील दुकानदारांनी आपली बंद ठेवलेली दुकाने सुरू केली.

पदपथावरील विक्रेत्यांवर मुरगाव पालिका अंकुश आणत नसल्याने वास्कोतील मॉर्डन मार्केटमधील दुकानदारांनी आज सकाळी आपली दुकाने बंद ठेवून निषेध केला होता.

वास्कोत बिगर गोमंतकीय कपडे विक्रेते, चप्पल विक्रेते तसेच इतर सामानांची विक्री मोक्याच्या ठिकाणी दुकाने थाटून करत आहेत. लोकांना पाहिजे असलेले सामान रस्त्यावर मिळत असल्याने लोक गाडीतच बसून या विक्रेत्यांकडून सामान घेऊन जातात.

त्यामुळे मार्केटमधील दुकानांत ग्राहक येत नसल्याने दुकानदारांना नुकसानीला सामोरे जावे लागत आहे. पालिकेला सर्वप्रकारचे शुल्क भरून आम्हाला न्याय मिळत नाही. पालिका बेकायदेशीर अतिक्रमण करणाऱ्या विकेत्यांवर कारवाई करत नसल्याने पालिकेचे शुल्क भरून काहीच फायदा नाही, असे या दुकानदारांचे म्हणणे होते.