वास्को: नाताळ (Christmas) सणासाठी लागणाऱ्या साहित्याने वास्कोतील बाजारपेठ फुलली आहे. ख्रिस्ती बांधव नाताळ तसेच नवे वर्ष साजरे करण्यासाठी तयारीला लागले आहेत. ख्रिस्ती बांधवांचा मुख्य सण म्हणजे नाताळ अवघ्या काही दिवसांवर येऊन ठेपला आहे. घराचे रंग रंगोटीचे काम, दोदेल, करंज्या, बीबींक व इतर गोड पदार्थ बनविण्याच्या कामालाही लोक लागले आहेत.

दरम्यान नाताळ सणासाठी लागणारे सजावटीचे सामान बाजारपेठेत (Market) उपलब्ध झाले असून, ख्रिस्ती लोक सदर सामान खरेदी करताना दिसत आहेत. स्टार, बेल, सांताक्लॉज, हॉकी स्टिक, रंगीबिरंगी टोप्या, सांताक्लॉजचा पेहराव, गोठा बनवण्यासाठी लागणाऱ्या झोपड्या, मातीच्या मुर्त्या अशा विविध वस्तू वास्को (Vasco) बाजारपेठेत दाखल झाल्या आहेत.

दरम्यान, नाताळ सणासाठी गोठा देखाव्याचे काम युवावर्गाने सुरू केले आहे. सामान गोळा करण्याच्या कामाला युवावर्ग लागला आहे. गोठ्याचे काम करण्यासाठी युवा रात्रपाळी करत असल्याचेही दृष्टीपथास पडत आहे. ख्रिस्ती बांधव नाताळ सणासाठी सज्ज झाल्याचे पाहण्यात येत आहे.