Vasco News :

वास्को, नवेवाडे-वास्को येथील टॅक्सीचालक प्रकाश नाईक यांनी प्रामाणिकपणा दाखवून महिला प्रवाशाची टॅक्सीत विसरलेली रोख रक्कम तसेच पासपोर्ट परत केला. याबद्दल प्रकाश नाईक यांचे सर्व थरांतून कौतुक होत आहे.

मिळालेल्या माहितीनुसार, युके येथील एका महिला प्रवाशाने दाबोळी विमानतळावरून काणकोणकडे जाण्यासाठी प्रीपेड टॅक्सी बुक केली. त्यानुसार नवेवाडे येथील टॅक्सीचालक प्रकाश नाईक यांना हे भाडे मिळाले.

नाईक हे त्या महिलेला काणकोण येथे नियोजितस्थळी सोडून परत आले. ट्रिपवरून घरी परतल्यानंतर कारची स्वच्छता करताना त्यांना लहान पाऊच दिसला. त्यांनी तो तपासून पाहिला असता, त्यात टॅक्सीतून प्रवास केलेल्या महिला प्रवाशाचे २५ हजार रुपये आणि पासपोर्ट/व्हिसा होता.

त्यांनी तात्काळ काणकोण येथे जाऊन तो पाऊच त्या महिलेला परत केला. टॅक्सीचालक प्रकाश नाईक यांच्या प्रामाणिकपणाबद्दल त्यांचे कौतुक करण्यात येत आहे.