पणजी : गोव्यामधील किनको लिमिटेड (Kineco Limited) ही कंपनी वंदे भारत ट्रेनसाठी लागणारे 'फ्रंट स्ट्रक्चर' पुरवत आहे. Kineco कंपनीला वंदे भारत ट्रेनसाठी 68 'नोज कोन' पुरवण्याचे कंत्राट देण्यात आले आहे.

किनेकोचे संस्थापक आणि व्यवस्थापकीय संचालक शेखर सरदेसाई यांनी सांगितले की, त्यांची कंपनी सप्टेंबरमध्ये बर्लिन येथे होणाऱ्या InnoTrans 2022 एक्स्पोमध्ये हायस्पीड ट्रेनसाठी उपयुक्त उत्पादने सादर करणार आहे.

"मला घोषणा करताना अभिमान वाटतो की ही उत्पादने ट्रेन तंत्रज्ञानाशी निगडीत तज्ञांच्या नेतृत्वाखाली पिळर्ण येथील विकास केंद्रात आमच्या अंतर्गत संशोधनाद्वारे विकसित केली गेली आहेत," सरदेसाई म्हणाले.

केंद्राने 400 सेमी-हाय स्पीड 'वंदे भारत' ट्रेन्स तयार करण्याची आणि चालवण्याची योजना जाहीर केली आहे. या ट्रेन 200 किमी प्रतितास वेगाने धावण्यास सक्षम आहेत. किनेकोचा रेल्वे विभाग पिळर्ण इंडस्ट्रियल इस्टेट येथील रेल्वे उत्पादन सुविधेत 'नोज कोन' तयार करत आहे. ही फर्म 15 वर्षांहून अधिक काळ भारतीय रेल्वेला लागणारे पार्टचा पुरवठा करत आहे.